“Fərdi aqrar təsərrüfatların iqlim dəyişikliyinə adaptasiyası” mövzusunda təlim keçirilib

A- A A+

NUHÇIXAN xəbər verir ki, Naxçıvan Biznes Mərkəzində “AzerGold” Qapalı Səhimdar Cəmiyyətinin Korporativ Sosial   Məsuliyyət Komitəsi Heydər Əliyev Fondunun “Regional İnkişaf” İctimai Birliyi ilə tərəfdaşlıq çərçivəsində “Fərdi aqrar təsərrüfatların iqlim dəyişikliyinə adaptasiyası” mövzusunda təlim keçirib.

Tədbirdə Naxçıvan Muxtar Respublikasının İqtisadiyyat naziri Tapdıq Əliyev muxtar respublikada aqrar sahənin inkişafından danışıb.

“AzerGold”   QSC-nin   İdarə   Heyətinin   sədri   Zakir   İbrahimov BMT-nin təşəbbüsü ilə hazırlanan və 193 ölkənin qoşulduğu Dayanıqlı İnkişaf üzrə Qlobal Hədəflər 2030-un milli səviyyədə icra edildiyini qeyd edərək bu istiqamətdə ölkədə həyata keçirilən dövlət proqramlarını sadalayıb.  Həmçinin Heydər Əliyev Fondu tərəfindən ətraf mühitin mühafizəsi, müxtəlif sahələrdə, xüsusilə də sahibkarlığın dayanıqlı inkişafı istiqamətində həyata keçirilən layihələri, irəli sürülən təşəbbüsləri örnək göstərən Zakir İbrahimov, “AzerGold”   QSC tərəfindən həyata keçirilən korporativ sosial məsuliyyət tədbirləri haqqında da ətraflı məlumat verib.

Naxçıvan   Muxtar Respublikasının Ekologiya   və   Təbii   Sərvətlər   naziri   Mayis   Əliyev,   Heydər   Əliyev Fondunun Beynəlxalq Əlaqələr Departamentinin   rəhbəri   Soltan   Məmmədov,   Azərbaycan Respublikasının Kiçik və Orta Biznesin İnkişafı Agentliyinin İdarə Heyətinin sədr müavini Nadir Adilov və Azərbaycan Respublikası Ekologiya  və Təbii Sərvətlər Nazirliyinin Milli Hidrometeorologiya Xidmətinin direktor müavini İmran  Əbdulov iqlim dəyişikliyinin təsirləri  ilə  mübarizə  istiqamətində  ölkədə  görülən  tədbirlər  haqqında  tədbir  iştirakçılarına ətraflı məlumat verib, dövlətlə yanaşı, hər bir özəl müəssisənin də bu istiqamətdə daha fəal olmasının əhəmiyyətini  qeyd ediblər. 

Təlimdə Naxçıvan   Muxtar   Respublikasının müxtəlif   bölgələrində heyvandarlıq və bitkiçilik sahəsində fəaliyyət göstərən 60-dan çox sahibkar iqlim dəyişikliyi şəraitində su, torpaq və  bitki idarəçiliyi, kənd təsərrüfatında mövcud innovasiyalar,   iqlim dəyişikliyinə məruz qalan təsərrüfatlara qanunvericilikdə nəzərdə tutulan güzəştlər haqqında biliklər əldə ediblər. Geniş müzakirələrin və fikir mübadiləsinin aparıldığı 2 günlük təlimin sonunda sahibkarlar müvafiq sertifikatlarla təltif olunacaq.

Xatırladaq  ki, Azərbaycan   Respublikası   Birləşmiş   Millətlər   Təşkilatının   İqlim Dəyişmələri  üzrə  Paris  Sazişinə  26   oktyabr  2016-cı  il  tarixindən  etibarən  qoşulub  və  bu istiqamətdə ölkəmizdə silsilə tədbirlər həyata keçirilir.

 

Cavid Səfərli

Digər xəbərlər

Xəbərin mətnində orfoqrafik səhv var

Seçilən mətn düzəliş üçün göndəriləcək: