Ömürdən qalan izlər
Naxçıvan ədəbi mühitində öz dəsti-xətti ilə tanınan qocaman şair-pedaqoq, dilçi alim Əbülfəz Muxtaroğlunun “Ömürdən qalan izlər” kitabı işıq üzü görüb. Ön sözünü akademik İsa Həbibbəylinin yazdığı kitaba müəllifin şeirləri, məqalələri və onun haqqında müxtəlif vaxtlarda yazılmış yazılar daxil edilib.
“Pərvanə olsaydım, səni şam bilib
Dönüb-dolanardım başına sənin”
- deyən Əbülfəz Muxtaroğlu mədh etdiyi vətənini qaya-qaya, oba-oba, insan-insan tanıdır. Vətən sevgisiylə yazılmış misralar oxucunun əlindən tutub Naxçıvanın gözəlliklərini addım-addım gəzdirir, tarixin dolaylarına aparır, bu elin şənliyinə sevinməyə, kədərinə ortaq olmağa, insanları haqqa, ədalətə, sevgiyə səsləyir:
“Ən böyük arzumdur mənim dünyada,
Necə ki, gəzirəm Ana Vətəni
Paltarı ləkəli görsəniz də siz
Vicdanı ləkəli görməyin məni.”
Kitaba daxil edilmiş məqalə və araşdırmalarda müəllif müxtəlif dövrlərdə Azərbaycan ədəbiyyatı ilə yanaşı Naxçıvan ədəbi mühitində yetişib öz sözünü demiş imzalara üz tutur, müxtəlif əsərlərlə bağlı fikirlərini oxuculara təqdim edir. “Azərbaycan poeziyasında Azərbaycan dərdi, onun bölünməzliyi, vahidliyi həmişə aparıcı xətt olub”, “İnsan cəmiyyətinin bütün dövrlərində şairlər haqsızlığa, ədalətsizliyə qarşı çıxıblar”, “Həssas sənətkar nəyə, kimə, nə üçün və necə etiraz edir?” və s. fikirlərlə müxtəlif səpkili əsərlərə güzgü tutur, onlar barədə ətraflı məlumat verir.
“Ömürdən qalan izlər”də balacalar da yaddan çıxmayıblar. “Gül balalar küsər məndən” deyən müəllif onları müxtəlif səpkili şeirlərlə sevindirir.
Kitabda toplanan məqalələrin bir qismi isə müasirlərinin Əbülfəz Muxtaroğlunun həyat və yaradıcılığına baxışını əks etdirir, oxuculara onun müxtəlif dövrlərdə çap olunmuş kitabları, keçirdiyi görüşləri ilə bağlı məlumat verir.
Kitabda həmçinin müəllifin müxtəlif dövrlərdə müxtəlif mətbuat orqanlarında verilmiş müsahibələri də yer alır.