Naxçıvan şəhərində tikinti-quruculuq işləri davam etdirilir - FOTOLAR
NUHÇIXAN xəbər verir ki, hazırda Naxçıvan şəhərində quruculuq işləri davam etdirilir. Müasir tələblərə cavab verən 5 nömrəli tam orta məktəb binasında son tamamlama işləri görülür. Binanın həyətində abadlıq işləri aparılır, müasir işıqlandırma sistemləri qurulur. 1148 şagird yerlik olacaq məktəbdə əlavə 2 korpus tikilib. Burada 58 sinif otağı, 2 elektron lövhəli sinif, müxətlif laboratoriyalar, 3 kompüter otağı, idman zalı, kitabxana, hərbi kabinə və digər otaqlar yaradılır.
Həmçinin Naxçıvan şəhərində yeni yaşayış binaları tikilir və mövcud binalarda əsaslı təmir aparılır. Heydər Əliyev prospektində tikilən 44 mənzilli 6 mərtəbəli yeni yaşayış binası milli və müasir memarlıq üslubunda inşa olunur. Binada ikiotaqlı, üçotaqlı, dördotaqlı, yeddiotaqlı və doqquzotaqlı mənzillər yerləşəcək. Yaşayış binasında lift quraşdırılacaq, zirzəmidə 29 yerlik avtomobil dayanacağı yaradılacaq. 4 girişi olan binanın birinci mərtəbəsində 12 mağaza istifadəyə veriləcək.
Həmin prospektdə 7 mərtəbəli 6 mənzilli yeni yaşayış binası da inşa olunur. Hər mənzilin sahəsi 130 kvadratmetr olacaq. Atatürk küçəsindəki 14 nömrəli, 4 mərtəbəli yaşayış binası isə əsaslı təmir edilir. Binanın binövrəsi möhkəmləndirilir.
Hazırda isə Nizami küçəsindəki 40 nömrəli binada əsaslı təmir işləri davam etdirilir. Şəhərimizin digər küçələrində çoxmərtəbəli yaşayış binaları da təmir olunur. Təmir olunan binaların zirzəmilərində istilik, qaz, su və kanalizasiya xətləri tamamilə yenidən çəkilir. Elektrik, rabitə xətləri də dəyişdirilir. Həyətlərdə müasir işıqlandırma sistemləri qurulur, yaşıllıqların salınması üçün yerlər hazırlanır.
Əbülfəz Dünyamalıyev