Xalq artistinin 60 illik yubileyi qeyd olunub

NUHÇIXAN xəbər verir ki, Cəlil Məmmədquluzadə adına Naxçıvan Dövlət Musiqili Dram Teatrında Azərbaycan Respublikasının xalq artisti Şirzad Abutalıbovun 60 illik yubileyi keçirilib.

Tədbirdə  Naxçıvan Muxtar Respublikasının mədəniyyət naziri Natəvan Qədimova bildirib ki, muxtar respublikada sənət adamlarının yubileyləri yüksək səviyyədə qeyd olunur. Bu gün Azərbaycan Respublikasının Xalq artisti Şirzad Abutalıbovun 60 illik yubileyinin keçirilməsi də   buna bariz nümunədir.

Xalq artistinin keçdiyi həyat yolundan və səhnə fəaliyyətindən danışdıqdan sonra Natəvan Qədimova yubilyarı təbrik edib, ona Naxçıvan Muxtar Respublikası Ali Məclisinin  Sədri adından  hədiyyə təqdim edib.

Tədbirdə Xalq artistinin sənət dostları Naxçıvan Dövlət Musiqili Dram Teatrının direktoru, xalq artisti Rza Xudiyev, Həsən Ağasoy, Kamran Quliyev və digərləri çıxış edərək yubilyara ürək sözlərini bildirib, onu 60 illik yubileyi münasibətilə təbrik ediblər.

Sonda Xalq artisti  Şirzad Abutalıbov  yaradıcılığına yüksək qiymət verildiyi üçün Naxçıvan Muxtar Respublikası Ali Məclisinin Sədrinə  minnətdarlıq edib, səhnə sənətimizin inkişafı üçün bundan sonra da fədakarlıqla çalışacağını deyib.

                                                            Mədinə Rəhimli