Təhlükəsizliyimiz bizim vəzifəmizdir

583

Hələ 1980-ci illərdə mərhum şair Nüsrət Kəsəmənlinin bir şeiri çox məşhur idi. Şeir “Bir əcnəbiyə cavab” adlanırdı. Haradasa bir tədbirdə əcnəbi jurnalist keçmiş Sovet İttifaqının rəhbərlərindən birinə  sual vermişdi ki, bəs siz dünyada  sülh deyirsiniz, amma sərhədələriniz tikanlı məftillərlə qorunur. Bizimkilər isə açıqdır. Təbii ki, o zaman hamımızın ümumi bir vətəni vardı. Bu sual da sanki bütün vətəndaşlara ünvanlanmışdı. İkinci Dünya müharibəsinin dəhşətlərini görən və imperialist qüvvələr tərəfindən təhdidlərə davamlı məruz qalan bir ölkənin vətəndaşı kimi  Nüsrət Kəsəmənli şeirinin birinci misrasında deyirdi:

Deyirsən sərhəddə bu tikan nədir?

Bizimki açıqdır, istəyirsən keç...

Mənim ki Vətənim bir qızılgüldür,

Qızılgül tikansız, de, olurmu heç?!

Təbii ki,  Vətən həmişə bir gülə bənzəyir, amma bu gül özbaşına, sahibsiz olanda onu istənilən adam qoparıb üzə bilər. Ona görə də, Vətənin məkrli niyyətlə ona doğru uzanan yad əllərə batan tikanı olan təhlükəsizlik  orqanları bu gün onu göz bəbəyi kimi qoruyur. Öz coğrafi mövqeyinə görə həssas geosiyasi, yeraltı və yerüstü təbii ehtiyatları ilə  zəngin məkanda yerləşən Azərbaycan, onun bir hissəsi olan Naxçıvanda bu məsələ həmişə tarixən  aktual olub və yəqin ki, bundan sonra da olacaq. Çünki bizim taleyimizə işğalçı bir ölkə-Ermənistan kimi  təcavüzkarla qonşu olmaq düşüb.

Bu günlərdə Naxçıvan Muxtar Respublikası Ali Məclisi Sədrinin də iştirak etdiyi Dövlət Təhlükəsizliyi Xidmətində “Naxçıvan Muxtar Respublikasında təhlükəsizliyin təmin olunması sahəsində görülən işlər və qarşıda duran vəzifələr barədə” keçirilən müşavirədə bu məsələ bir daha gündəmə gətirildi.

Bu danılmaz faktdır ki, Azərbaycanda təhlükəsizlik xidmətinin peşəkar şəkildə milli kadrlarla fəaliyyəti ümummilli lider Heydər Əliyevin adı ilə bağlıdır. Hələ Sovet İttifaqının ən güclü zamanında milli dəyərlərin  qəsdən  arxa plana keçirildiyi vaxtlarda Azərbaycanda hakimiyyətə gələn Ümummilli lider bu sistemdə azərbaycanlı  kadrların yetişdirilməsi üçün uzaqgörən addımlar atdı. Nəticədə həmin kadrlar 1990-cı illərdə müstəqil olan Azərbaycanın milli maraqlarının qorunmasında Ümummilli liderlə birlikdə mübarizə apardılar.

Təbii ki, məhz bunun nəticəsində 1990-cı illərin gərgin ictimai-siyasi sınaqlarından  Azərbaycan dövlətçiliyi qətiyyətlə çıxdı. Bir məqamı diqqətə çatdırmaq yerinə düşər ki, milli maraqlar və dövlətçilik təkcə xüsusi xidmət orqanları, ordu, sərhəd, polisin gücü ilə qorunmamalıdır. Bu sahədə fəaliyyət göstərən insanlar da Azərbaycan vətəndaşlarıdır. Onlarla bərabər Vətənin, dövlətin toxunulmazlığı hamı-bütün vətəndaşlar tərəfindən diqqətdə olmalı, həyat tərzi, yaşam amalına çevrilməlidir. Bu gün dünyanın bir sıra ölkələrində bu məsələ çox vacib bir məqam kimi diqqətdə saxlanılır. Yəni insanların həyatında dövlətçilik əleyhinə yönələn hər hansı bir hadisə və ya hal dərhal vətəndaş müdaxiləsi ilə üzləşir.  Çünki hamı yaxşı başa düşür ki, bu Vətən, torpaq, dövlət onun və övladarınındır. Onun təhlüksizliyi, müstəqilliyi, süverenliyi və ya milli maraqlarının əksinə nə baş verərsə deməli bu birbaşa onun da taleyinə, həyatına, gələcəyinə mənfi təsir edən hal olacaq. İstər daxildən, istərsə də xaricdən kənar təsirlərə  məruz qalan bir dövlət və vətəndaşları təbii ki, az bir zamanda  məhvə məhkumdur. Ona görə də, Azərbaycan adlanan inkişaf edən bir dövlətin bu günü və sabahının təhlükəsizliyi birinci növbədə onun vətəndaşlarının sayıqlığından asılıdır.

Vətənpərvərlik hər kəsin qanında, düşüncəsində  olmalıdır. Bu ailədə, cəmiyyətdə, ictimai düşüncədə formalaşmalı, geniş şəkildə həyatda tətbiq edilməlidir. Milli və dövlətçilik maraqları hər bir şeydən üstün tutulmalı, öndə gəlməlidir.   

Təhlükəsizliklə bağlı tədbirdə  Naxçıvan Muxtar Respublikası Ali Məclisinin Sədri Vasif Talıbov əfsanəvi sovet kəşfiyyatçısı Yuri Andropovun bir fikrini səsləndirdi:  “Bir tərəfdən siyasi vəziyyət var, digər tərəfdən əməliyyat vəziyyəti. Bunlar hər zaman üst-üstə düşmür: iki dövlət yaxşı siyasi əlaqələr saxlaya bilər, amma eyni zamanda kəşfiyyatçılar və əks-kəşfiyyatçılar səylə mübarizə aparmalıdır”. Bu ifadənin arxasında hər bir vətəndaşın öz ölkəsinin təhlükəsizliyi ilə bağlı məsuliyyəti dayanır. Bu gün Naxçıvan Muxtar Respublikasının hər bir vətəndaşı üçün dünyanın müxtəlif ölkələrinə sərbəst səfərlər etmək, səyahətə getmək adi haldır. Amma hər bir vətəndaş unutmamalıdır ki,  o getdiyi ölkədə Azərbaycanı, azərbaycançılığı təmsil edir. Əcnəbi (istər yaxın, istərsə də uzaq) ölkələrin vətəndaşları ilə təmas qurulan zaman dəfələrlə özüm də şahidi olmuşam ki, nədənsə ilk sualları ölkənin ictimai-siyasi vəziyyəti ilə bağlı olur. Yəni yaşayış, güzəran, iş yerləri, aldığın maaş həmsöhbətlərin üçün maraqlı gəlir. Bu məqamda unutmaq olmaz ki, bu insanlar heç də bizə canıyananlıq üçün bu işlərlə maraqlanmırlar. Bu gün Azərbaycanın dünyada yetərincə nüfuzu, sürətli inkişafi və iqtisadi qüdrəti hamıya yaxşı məlumdur. Bu cür adamlar isə verdikləri suallarla ölkənin daxili sabitliyi, yaşayışı və təhlükəsizliyini bizim dilimizdən eşitmək istəyir, bir növü sayıqlığmızı yoxlayırlar. Əgər bu hal rastınıza çıxarsa bilin ki,  “canıyananlılıqla” verilən bu sualların arxasında sizə qarşı qayğıkeşlik deyil, hansısa məkrli planın bir hissəsi dayanır. Təbii ki, verdiyimiz cavab da bizim öz vicdanımız və dövlətçiliyimiz qarşısında daşıdığımız məsuliyyətdir.

Mən hələ qonaq, turist, dindar, elm adamı və digər zümrələrin nümayəndəsi kimi ölkəmizə gəlib, vətəndaşlar arasında zərərli ideologiya yaymağa, gizli yolla öz maraqlarını bizə sırımağa çalışan, daxilimizdəki iradəsi zəif olanları, xüsusilə də gəncləri “tora salmaqla” ələ almaq üçün dəridən-qabıqdan çıxanların uğursuz cəhdlərini demirəm.  

Etiraf edək ki, dünyada hər bir dövlətin öz maraqları onun xüsusi xidmət orqanları  üçün mühüm əhəmiyyət kəsb edir. Belə olan halda biz niyə öz maraqlarımızı kiməsə güzəşt etməliyik?!  

Bu gün sevindirici haldır, Naxçıvan Muxtar Respublikasında  təhlükəsizlik tədbirləri əsl peşəkarlıqla, ustalıqla həyata keçirilir. Ərazi bütövlüyümüzə, milli maraqlarımıza, dövlətçiliyimizə zərbə vuracaq hər bir halın qarşısının vaxtında alınması üçün fəaliyyət göstərən peşəkarlarla yanaşı maddi texniki bazası gücləndirilən  idarələr, qurumlar da mübarizə aparır. Naxçıvan Muxtar Respublikası Ali Məclisinin Sədri Vasif Talıbovun  dediyi kimi:  “Naxçıvan Muxtar Respublikası strateji mövqedə yerləşir. İşğalçı ölkə ilə sərhədin olması, ehtimal olunan təhdid və risklər təhlükəsizlik sahəsində tədbirləri genişləndirməyi zəruri edir. Ona görə də, muxtar respublikanın xüsusi xidmət orqanları müasir dövrün təhdidlərini nəzərə almaqla qabaqlayıcı tədbirlər görməli, təhlükəsizliyin tam təmin olunması üçün fəaliyyətlərini gücləndirməlidirlər”.

Bütün bu işlər isə sözsüz ki, vətəndaş həmrəyliyi, sayıqlığı və milli düşüncəsinin dəstəyi ilə hərtərəfli şəkildə dəstəklənməklə davam etməlidir. Heç kəs unutmamalıdır ki, bu Vətən və müstəqil dövlət bizimdir. Onun sabitliyi, müstəqilliyi və toxunulmazlığı bizə yadigar qoyulub. Onu olduğu kimi gələcək nəsillərə də çatdırmaq bizim mənəvi və vətəndaşlıq borcumuzdur.

Səməd Canbaxşiyev

Digər xəbərlər

Xəbərin mətnində orfoqrafik səhv var

Seçilən mətn düzəliş üçün göndəriləcək: