Yeni xidməti avtomobillərin və 500 ədəd kommunal təyinatlı konteynerin təqdimatı oldu - FOTOLAR
NUHÇIXAN xəbər verir ki, muxtar respublikaya gətirilmiş 500 ədəd kommunal təyinatlı konteyner və xidməti minik avtomobillərinin təqdimatı olub.
Tədbirdə Naxçıvan Muxtar Respublikası Baş nazirinin müavini- maliyyə naziri Səbuhi Məmmədov bildirib ki, Naxçıvan Muxtar Respublikası Ali Məclisinin Sədri Vasif Talıbovun tapşırığına əsasən kommunal müəssisələrin, bələdiyyələrin, yerli icra orqanlarının maddi-texniki bazasının möhkəmləndirilməsi həyata keçirilir.
Səbuhi Məmmədov yeni məişət tullantıları konteynerlərinin təqdim olunmasını da bu istiqamətdə həyata keçirilən tədbirlərin tərkib hissəsi kimi dəyərləndirib, bu sahədə çalışan kollektivlərə işlərində uğurlar arzulayıb.
Qeyd edək ki, gətirilən 500 yeni konteynerdən 40-ı Naxçıvan Şəhər Sanitar-Təmizlik İdarəsinə, qalanları isə muxtar respublikanın bütün rayon inzibati ərazi dairələri əhatə olunmaqla yerlərdə fəaliyyət göstərən kommunal müəssisələri kombinatlarına və bələdiyyələrə verilib.
Tədbirdə eyni zamanda dövlətimizin qayğısının digər bir nümunəsi kimi Babək rayonunun Nehrəm kənd inzibati ərazi dairəsi üzrə nümayəndəlik və bələdiyyəsi, Cəhri kənd inzibati ərazi dairəsi üzrə nümayəndəlik və Sədərək rayonunun Heydərabad qəsəbəsi inzibati ərazi dairəsi üzrə nümayəndəliyinə xidməti istifadə üçün yeni minik avtomobilləri təqdim edilib.
Tədbirdə inzibati ərazi dairəsi üzrə nümayəndələr və bələdiyyə sədrləri bu diqqət və qayğıya görə minnətdarlıqlarını bildiriblər.
Əbülfəz Dünyamalıyev