Şərurda istedadlı qadınların əl işlərindən ibarət sərgi-satış olub - FOTOLAR

NUHÇIXAN xəbər verir ki, Şərur rayonunda istedadlı qadınların əl işlərindən ibarət sərgi-satış təşkil olunub. Tədbirdə Şərur Rayon İcra Hakimiyyəti başçısının müavini Vüsalə Ağayeva  qeyd edib ki, muxtar respublikada  həyata keçirilən dövlət-qadın siyasətinin tərkib hissəsi olaraq istedadlı qadınların fəaliyyətlərinin dəstəklənməsinə xüsusi diqqət yetirilir. Qadınların əl işlərindən ibarət sərgilərin təşkil olması da  bu tədbirlərin davamıdır. Bildirilib ki, muxtar respublika qadınları dövlət quruculuğunda, ictimai həyatda  fəal iştirak edir, sosial-iqtisadi, elmi və mədəni inkişafa öz töhfələrini verirlər. Şərur rayonunda da  xüsusi  istedadları ilə seçilən rəssamlıq, toxuculuq, el sənəti nümunələrini yaşadan qadınlara da  xüsusi diqqət göstərilir. Bu ilin iyun ayında Avropa İttifaqının maliyyə dəstəyi ilə “Qadınların  dayanıqlı inkişaf üçün  səlahiyyətləndirilməsi” layihəsi  çərçivəsində  Şərur rayonunda keçirilən iki günlük təlimlərdə  istedadlı və biznes ideyasına malik olan 30-a yaxın qadın iştirak edib, onlara sertifikatlar təqdim olunub. Gənc qızların müəyyən peşələrə yiyələnməsi, həmçinin istedad və bacarıqlarının inkişaf etdirilməsi üçün  müxtəlif peşə kursları təşkil olunur.

Sonra sərgiyə baxış olub. Sulu və yağlı boya ilə işlənən tablolarla yanaşı tikmə, toxuma, xalçalar və digər  dekorativ sənət  nümunələri maraqla qarşılanıb.

İstedadlı qadınların  əl işlərindən ibarət sərgi-satışda  rayonun  52 istedadlı qadınının 400-dən artıq rəsm və əl işi nümayiş  olunur.

Turab Hacızadə