Naxçıvan Muxtar Respublikası Ali Məclisinin deputatı Qürbət Rzayevin vəfatı ilə əlaqədar nekroloq verildi

821

“Şərq qapısı” qəzetində Naxçıvan Muxtar Respublikası Ali Məclisi, Yeni Azərbaycan Partiyası Naxçıvan Muxtar Respublika Təşkilatı adından Naxçıvan Muxtar Respublikası Ali Məclisinin deputatı Qürbət Rzayevin vəfatı ilə əlaqədar nekroloq yerləşdirilib.

NUHÇIXAN həmin nekroloqu təqdim edir :

Naxçıvan Muxtar Respublikası Ali Məclisinin deputatı, Naxçıvan Muxtar Respublikasının Əməkdar müəllimi Rzayev Qürbət İsmayıl oğlu 2019-cu il avqustun 9-da vəfat etmişdir. Qürbət Rzayev 1941-ci ildə Qazaxıstan Respublikasının TaldıKurqan vilayətinin Kirovski rayonunun Kirov kəndində anadan olmuşdur. 1949-1960-cı illərdə Qazaxıstanın Kirov rayonunda orta məktəbdə təhsil almış, 1960- 1961-ci illərdə Aza kənd məktəbində orta təhsilini başa vurmuşdur. 1962-ci ildə Mirzə Fətəli Axundov adına Azərbaycan Pedaqoji Dillər İnstitutunun qiyabi şöbəsinə qəbul olunmuş, həmin ildən Ordubad rayonunun Sabirkənd orta məktəbində müəllimlik fəaliyyətinə başlamışdır. O, 1967-ci ildə Sabirkənd orta məktəbinin tədris işləri üzrə direktor müavini, 1968-1972-ci illərdə həmin məktəbin direktoru, 1972-1996-cı illərdə Sabirkənd orta məktəbində rus dili müəllimi, 1996-1999-cu illərdə Ordubad Rayon Təhsil Şöbəsinin müdiri vəzifələrində işləmişdir. 1994-cü ildən Yeni Azərbaycan Partiyasının üzvü olan Qürbət Rzayev 1999-cu ildən ömrünün sonuna qədər Yeni Azərbaycan Partiyası Ordubad Rayon Təşkilatının sədri vəzifəsində işləmiş, ikinci, üçüncü, dördüncü və beşinci çağırış Naxçıvan Muxtar Respublikası Ali Məclisinin deputatı seçilmişdir. Əməyi dövlətimiz tərəfindən qiymətləndirilmiş, “Naxçıvan Muxtar Respublikasının Əməkdar müəllimi” fəxri adına və Naxçıvan Muxtar Respublikası Ali Məclisinin Fəxri fərmanına layiq görülmüşdür. Qürbət Rzayevin əziz xatirəsi onu tanıyanların qəlbində daim yaşayacaqdır. Allah rəhmət eləsin!

Digər xəbərlər

Xəbərin mətnində orfoqrafik səhv var

Seçilən mətn düzəliş üçün göndəriləcək: