Şahbuzda ailə təsərrüfatı məhsullarının sərgi-satışı təşkil olunub - FOTOLAR

NUHÇIXAN xəbər verir ki, Şahbuz şəhərində Heydər Əliyev prospektində təşkil olunan ailə təsərrüfatı məhsullarının sərgi-satışında  rayonun 24 yaşayış  məntəqəsindən  80-ə yaxın ailə təsərrüfatı sahibləri iştirak edib. Təsərrüfat sahibləri sərgi-satışa 20 növdə, 79 adda  2300 qablaşdırılmış məhsul çıxarıblar. Alıcılara qaymaq, xama,  müxtəlif növ mürəbbələr, pendir, qatıq, cəviz, meyvə araqları, eləcə də turşular, kompotlar, Şahbuz təbiətinin nemətlərindən olan və şəfalı  bitkilər  təklif edilib.

Qeyd edək ki, Şahbuz rayonu bu gün yerli və xarici turistlərin ən çox üz tutduğu məkanlardandır . Belə tədbirlər  həm yerli məhsulların alınması və həm də turistlərin vaxtlarının səmərəli keçirilməsi baxımından mühüm əhəmiyyət kəsb edir. Sərgi-satış rayona gələn yerli və xarici  turistlərin marağına səbəb olub, onlar rayonun ekoloji cəhətdən saf məhsullarından alıblar. 

İki gün davam edən sərgi-satışda ən yaxşı ailə təsərrüfatı nominasiyası üzrə  qaliblər də müəyyənləşdirilib. Münsiflər heyətinin  qərarına əsasən ən yaxşı məhsul nominasiyası üzrə Şahbuz kənd sakini Sevinc Bayramova 1-ci yerə, Ayrınc kənd sakini Xəqani Abdullalı ikinci yerə, Külüs kənd sakini Səxavət Paşayev isə 3-cü yerə layiq görülüblər. Qaliblər Şahbuz rayon İcra Hakimiyyətinin  diplomları ilə təltif olunub.

2 gün davam edən sərgi-satışda iştirakçılara iaşə xidməti də göstərilib.

Qeyd edək ki, 2019-cu ilin Naxçıvan Muxtar Respublikasında “Ailə təsərrüfatları ili” elan olunması  və bu sahəyə göstərilən dövlət dəstəyinin nəticəsində Şahbuz rayonunda bu istiqamətdə mühüm nəticələr əldə edilib. Cari ildə dövlət tərəfindən  10 ailə təsərrüfatçısına  məhsul istehsalını  daha da artırmaq üçün  81 min manat kredit verilib.