BMT-nin Baş katibi iqlim dəyişmələri ilə mübarizədə Portuqaliyanın ön planda olmasından məmnundur

Birləşmiş Millətlər Təşkilatının Baş katibi Antonio Quterreş bir portuqaliyalı kimi ölkəsinin iqlim dəyişmələri ilə mübarizədə, həmçinin miqrasiya və qaçqınlar məsələsində ön planda olması ilə fəxr etdiyini bildirib.

NUHÇIXAN Portuqaliya KİV-lərinə istinadla xəbər verir ki, Quterreş Portuqaliya Respublikasının Prezidenti Marselu Rebelu de Souza ilə görüşdə bu barədə bəyan edib.

“Portuqaliya xüsusilə çətin vəziyyətlərdə vətəndaşların silahlı qruplaşmalardan müdafiə olunmasında BMT-yə çox dəyərli yardım göstərib və qeyri-adi qabiliyyətini nümayiş etdirib. Bütün digər ölkələr onun bu qabiliyyətinə heyrandırlar”, - deyə Quterreş jurnalistlər üçün bəyanatında bildirib.

Miqrasiya və qaçqınlar məsələsinə gəlincə, BMT-nin Baş katibi Portuqaliyanın nümunə göstərərək qeyd edib ki, bu ölkə miqrasiya haqqında saziş üzrə fəaliyyət planını təsdiqləyən ilk ölkə olacaq.