Bu şəhərin sakitliyi

10:57 17.11.2019

Naxçıvan-yerlə göyün daha yaxın olduğu məkan... Burda göylər yerə aşiqdir sanki. Hər gün yeri sığallayaraq ona nəğmələr söyləyir ucalıq. Bəzən yuyur torpağı, ona həyat verir, bəzən isidir. Dəyişməyən isə gündüz günəş, gecə ay qoruyur bu yurdu. Qayğısına qalır. Sevgi deyilmi bu?!

Bir də bu yurdu daha ucalardan seyr etmək lazımdı. Bu məkanda fərq etməz. Evin pəncərəsindən baxan da, uca zirvəyə qalxan da eyni mənzərəni-təbiəti görür. Təbiət insana yalnız rahatlıq bəxş edir. Gözlərimizin gördüyü ən gözəl mənzərədir-Naxçıvan

Təbiət bu yerlərə zərrə qədər zərər verməyib. Yalnız öz nurundan-bərəkətindən paylayıb müqəddəs torpağa. Ətrafa can verən günəşin səhərlər uca dağların arxasından boy göstərməsi ayrı bir mənzərə, qürub etməsi tam başqa bir gözəllikdir. Gecələr yerdə parlayan ulduzlar isə tam fərqli bir möhtəşəmlik qatır məmləkətimə.

Aşiq olduğum bu yurdun gecəsi də, gündüzü də fərqlidir. Saatından asılı olmayaraq sərbəst, rahat, təhlükəsiz şəkildə dolaşmaq isə Naxçıvanın adamı heyran edən ən fərqli cəhətidir!