Babək rayon Dövlət Yanğın Təhlükəsizliyi şöbəsində məşğələ olub - FOTOLAR

Naxçıvan Muxtar RespublikasıFövqəladə Hallar Nazirliyinin iş planına uyğun olaraq Babək rayon Dövlət Yanğın Təhlükəsizliyi şöbəsində “Gündəlik həyat fəaliyyətinin təmin edilməsi, yanğınsöndürmə xidmətinin təşkili və aparılması” mövzusunda nümunəvi məşğələ keçirilib.

Fövqəladə Hallar Nazirliyinin mətbuat xidmətindən NUHÇIXAN-a verilən məlumata görə, məşğələnin planına uyğun olaraq ilk növbədə növbətçi yanğınsöndürmə xidmətlərinin yerbəyerinin keçirilməsi qaydası məşq etdirilib, fiziki idman hazırlığı üzrə çalışmalar yerinə yetirilib, şəxsi heyətdən yanğın xilasetmə hazırlığı yoxlanıb. Daha sonra növbətçi yanğınsöndürmə xidməti rəisləri tərəfindən xidməti sənədlərin işlənilməsi, radio-rabitə vasitələri ilə danışıq qaydaları, radiotelefonçulara aid sənədlərin işlənilməsi şəxsi heyətə çatdırılıb, şəxsi heyətin “Həyəcan” siqnalı ilə qaldırılması əyani şəkildə məşq etdirilib. 

Təlimdən və yanğından sonra yanğınsöndürmə avtomobillərinə, yanğın-texniki vasitələrinə texniki qulluğun göstərilməsi, yol vərəqlərinin düzgün doldurulması üzrə aidiyyəti vəzifəli şəxslərin vəzifə borclarının yerinə yetirilməsi qaydası şəxsi heyətə öyrədilib. 

Yekunda döyüş və peşə hazırlığının artırılması istiqamətində tövsiyə və tapşırıqlar Babək rayon Dövlət Yanğın Təhlükəsizliyi şöbəsinin şəxsi heyətinə çatdırılıb.