Xarici və ölkə mediasının nümayəndələri Naxçıvanda olublar - VİDEO
NUHÇIXAN xəbər verir ki, Ümumdünya Mətbuat Şuraları Assosiasiyasının və Azərbaycan Mətbuat Şurasının nümayəndələri Naxçıvan Muxtar Respublikasında səfərdə olublar. Qonaqlar səfərləri çərçivəsində media mərkəzlərində, tarixi memarlıq abidələrində, ali təhsil ocaqlarında olub, beynəlxalq konfransda iştirak ediblər. Konfrans çərçivəsində Naxçıvan mətbuat şurası Ümumdünya Mətbuat Şuraları Assosiasiyasına üzv seçilib.
Əvvəlcə qonaqlar ulu öndər Heydər Əliyevin Naxçıvan şəhərinin baş meydanındakı abidəsinin önünə gül dəstəsi qoyub, öz ehtiramlarını bildiriblər.
Heydər Əliyev Muzeyi ilə tanışlıq zamanı məlumat verilib ki, muzeydə Ulu öndərin həyat və fəaliyyətini əks etdirən dəyərli eksponatlar sərgilənir. Qonaqlar ümummilli lider Heydər Əliyevin Naxçıvandakı fəaliyyəti ilə xüsusi maraqlanıblar. Bildirilib ki, muzeyin kitabxanasında 538 adda 1100-dən çox ədəbiyyat nümayiş etdirilir.
Ulu öndər Heydər Əliyevin 1991-1993-cü illərdə Naxçıvan Muxtar Respublikası Ali Məclisinin Sədri işlədiyi vaxtlara aid eksponatlar diqqəti cəlb edib. Ali Məclisin mətbuat xidmətinin həmin dövrə aid məlumatları, “Şərq qapısı” qəzetinin nüsxələri də muzeydə qorunub saxlanılır.
Muzeydə ümummilli liderin ictimai-siyasi fəaliyyəti, xarici dövlət başçıları ilə çəkilmiş fotoları, xatirə əşyaları, jurnalistlərlə görüşlərini əks etdirən fotolar və digər eksponatlar maraq doğurub.
Azərbaycan Mətbuat Şurasının sədri Əflatun Amaşov, Ümumdünya Mətbuat Şuraları Assosiasiyasının rəhbəri Melek Sule Aker, Assosiasiyanın üzvləri nigeriyalı media eksperti Nick Nvolisa, Ümumdünya Mətbuat Şuraları Assosiasiyasının ictimaiyyətlə əlaqələr mərkəzinin rəhbəri Nurhan Günsev, “İki sahil” qəzetinin baş redaktoru, Azərbaycan Mətbuat Şurası idarə heyətinin üzvü Vüqar Rəhimzadə, Azərbaycan Mətbuat Şurasının sədr müavini Umud Rəhimoğlu muzeyin xatirə kitabına ürək sözlərini yazıblar.
Sonra Naxçıvan Şəhər İcra Hakimiyyətinin rəsmi tədbirlər zalında “Onlayn media və sosial şəbəkələr: Yeni dövrün çağırışlarında jurnalist peşəkarlığı və cəmiyyətin mənafeləri” mövzusunda beynəlxalq konfrans öz işinə başlayıb.
Konfransda Naxçıvan Muxtar Respublikası Ali Məclisi Aparatının Mətbuat və İctimaiyyətlə Əlaqələr Şöbəsinin müdiri Ülvi Hüseynli qeyd edib ki, bu gün Azərbaycanda və onun Naxçıvan Muxtar Respublikasında kütləvi informasiya vasitələrinin inkişafına böyük diqqət və qayğı göstərilir. Naxçıvan Muxtar Respublikası Ali Məclisi Sədrinin qayğısı ilə bütün sahələrdə əldə olunan inkişaf və yüksəliş muxtar respublikanın kütləvi informasiya orqanlarını da əhatə edib.
Bildirilib ki, bir əsrə yaxın tarixi olan Naxçıvan mətbuatı bu gün əsl inkişaf dövrünü yaşayır. Bu bir reallıqdır ki, muxtar respublika mediası ən müasir avadanlıqlarla təmin olunub. Universitet televiziyası və radiosu da daxil olmaqla 3 televiziya, 3 radio, 9 qəzet, ali təhsil və elm müəssisələrinin qəzet və jurnalları, “Nuhçıxan” İnformasiya Agentliyi fəaliyyət göstərir.
Diqqətə çatdırılıb ki, son illərdə media qurumlarının saytları yenilənib, onlar geniş oxucu və izləyici kütləsi qazanıblar.
Bu gün muxtar respublika barədə ölkə mətbuatı ilə yanaşı, eyni zamanda Türkiyə, Rusiya, Amerika Birləşmiş Ştatları, Çili, Səudiyyə Ərəbistanı, Böyük Britaniya, İspaniya, Pakistan, Yaponiya, Malayziya və digər ölkələrin kütləvi informasiya vasitələrində, sosial şəbəkə hesablarında məqalələr verilir, fotoşəkillər və videolar paylaşılır.
Azərbaycan Mətbuat Şurasının sədri Əflatun Amaşov şuranın fəaliyyəti barədə ətraflı məlumat verib, sosial şəbəkələrin və onlayn medianın əhəmiyyətini diqqətə çatdırıb. Bildirilib ki, şura daxil olan şikayətlər əsasında qeyri-dəqiq və qərəzli informasiyaların yayılması barədə araşdırmalar aparır, bu cür xoşagəlməz hallara qarşı mübarizədə fəal iştirak edir.
Əflatun Amaşov Naxçıvan Mətbuat Şurasının Ümumdünya Mətbuat Şuraları Assosiasiyasına üzv olması ilə bağlı qeyd edib ki, yeni memorondumun imzalanması ölkəmizin media mühitində əlamətdar hadisədir. Bu, həm də Naxçıvan mediasının müasir durumunu əks etdirməklə yanaşı onun beynəlxalq müstəviyə çıxarılma səviyyəsini də təsdiqləyir. Əflatun Amaşov həmçinin gənc tələbə-jurnalist kadrların Naxçıvan teleradisounda və “Şərq qapısı” qəzetində təcrübə kurslarına cəlb edildikdən sonra işə götürülmələrini də mütərəqqi addım sayıb. Qeyd edib ki, Naxçıvan Muxtar Respublikası Ali Məclisi Sədrinin Sərəncamı ilə əsası qoyulan hamilik təcrübəsinin ölkəmizin digər universitet və dövlət oqanları, eləcə də media qurumları arasında tətbiqi günün tələbinə çevrilib. Bu, Naxçıvanda gənc jurnalistlərin yenişməsində müstəsna rol oynayır.
Ümumdünya Mətbuat Şuraları Assosiasiyasının rəhbəri Melek Sule Aker assosiasiyanın fəaliyyət istiqamətləri barədə məlumat verərək qeyd edib ki, təşkilata 21 mətbuat şurası üzvdür. Biz çox sevinirik ki, Naxçıvan Mətbuat Şurası da assosiasiyaya üzv seçilir. Bunun nəticəsində ikitərəfli münasibətlər daha da genişlənəcək, beynəlxalq tədbirlərdə Naxçıvan mətbuatı da təmsil olunacaq. Melek Sule Aker mövzunun aktuallığını diqqətə çatdıraraq qeyd edib ki, sosial şəbəkələr və sosial media ictimai fikri formalaşdırır. Bu gün ən önəmli problemlərdən biri sosial medianın tənzimlənə bilməməsi və müəllif hüquqlarının pozulmasıdır. Bu problemin aradan qaldırılması üçün tənzimləyici hüquqi bazasının formalaşması bütün dünyada öndə duran məsələlərdəndir.
Əflatun Amaşov və Sule Aker göstərilən yüksək diqqətə və qonaqpərvərliyə görə Naxçıvan Muxtar Respublikası Ali Məclisi Sədrinə öz minnətdarlıqlarını ifadə ediblər.
Ümumdünya Mətbuat Şuraları Assosiasiyasının üzvü, Nigeriyadan olan beynəlxalq media eksperti Nick Nvolisa Nigeriyada və Orta Afrikada sosial medianın tənzimlənməsi və bu sahədə olan problemlər barədə məlumat verib.
Naxçıvan Dövlət Televiziya və Radio Verilişləri Komitəsinin sədri Sahil Tahirli vurğulayıb ki, muxtar respublikanın informasiya blokadası tam yarılıb. Naxçıvan televiziyası və radiosu dünyaya açılıb və hər bir nöqtədə izlənilir. Bu gün muxtar respublikanın mətbuat orqanlarının, “Nuhçıxan” İnformasiya Agentliyinin saytları və sosial şəbəkə hesabları dünyanın 140 ölkəsindən izlənilir və oxunur. İngilis və rus dillərində əhəmiyyətli xəbər və məqalələr hazırlanaraq yayılır. Bu da müstəqillik illərində əldə olunan ən böyük uğurlardan biridir. Sahil Tahirli deyib ki, Naxçıvan mediası sürətlə gəncləşir, gənc jurnalistlər onlayn media üzərindən Naxçıvan həqiqətlərinin yayılmasında yaxından iştirak edirlər. Təkcə son 5 ildə Naxçıvan Dövlət Universitetinin jurnalistika ixtisası üzrə bitirən 20 nəfər gənc Naxçıvan teleradiosunda işlə təmin edilib.
“Şərq qapısı” qəzetinin baş redaktoru Mehriban Sultanova bildirib ki, media qurumlarının sosial şəbəkələrdəki çoxminlik səhifələrinin yaradılması muxtar respublika barədə operativ, dəqiq və qərəssiz informasiyaların yayılmasını təmin edir.
Tədbirdə Naxçıvan Mətbuat Şurasının sədri Rövşən Hüseynov, Azərbaycan Mətbuat Şurasının sədr müavini Umud Rəhimoğlu, Mətbuat Şurasının İdarə Heyətinin üzvləri çıxış edərək mövzunun aktuallığı və Naxçıvan Mətbuat Şurasının Ümumdünya Mətbuat Şuraları Assosiasiyasına üzv seçilməsi barədə fikirlərini bölüşüblər.
Konfransın sonunda Naxçıvan Mətbuat Şurasının Ümumdünya Mətbuat Şuraları Assosiasiyasına üzv olması ilə bağlı ikitərəfli memorondum imzalanıb.
Qeyd edək ki, Naxçıvana gələn xarici və ölkə mediasının nümayəndələri Naxçıvan Muxtar Respublikasının mədəniyyət müəssisələri, media mərkəzləri, tarixi abdiələri və gəzməli-görməli yerləri ilə tanış olublar.
Qonaqlar Naxçıvan Dövlət Universitetində yaradılan şəraitlə tanış olublar. İnformasiya Kommunikasiya Texnologiyaları və Elektron Təhsil Şöbəsində məlumat verilib ki, universitet ərazisində elektron imtahanların keçirilməsi mərkəzi burada yerləşir. Ali təhsil ocağının sosial şəbəkə hesabları, saytı, elektron sənəd dövriyyəsi buradan idarə olunur.
Universitetin media mərkəzi ilə yaxından tanış olan qonaqlara məlumat verilib ki, mərkəzin maddi texniki bazası möhkəmlənib, bütün lazımi avadanlıqlar, ötürücülər istifadəyə verilib. Tələbələrin iştirakı ilə burada verilişlər, xəbər, videoçarx və sənədli filmlər hazırlanaraq təqdim olunur. Qonaqlar universitet televiziyasında veriliş aparıblar.
Jurnalistika ixtisasında təhsil alan tələbələrlə görüşdə çıxış edənlər ictimai fikrin formalaşmasında jurnalistikanın rolundan, müasir dövrdə onlayn medianın fəaliyyət istiqamətlərindən söhbət açıblar. Bildirilib ki, jurnalist hər şeydən öncə savadlı və bilikli olmalı, araşdırma aparmağı bacarmalıdır. Tələbələrin suallarına da aydınlıq gətirilib, onlara jurnalistin praktik yaradıcılığı mövzusunda mühazirə oxunub, jurnalistika nəzəriyyəsinə aid kitablar tələbələrə hədiyyə edilib. Azərbaycan Mətbuat Şurası İdarə Heyətinin üzvü, yazıçı Rəşad Məcid özünün yeni çapdan çıxan “Qələmsiz yazılanlar” kitabını gənc jurnalistlərə bağışlayıb.
“Şərq qapısı” qəzetinin redaksiyasında olan qonaqlara məlumat verilib ki, 2010-cu ildə “Əcəmi” Nəşriyyat-Poliqrafiya Birliyi üçün yeni kompleks istifadəyə verilib. Burada müasir şərait yaradılıb, yeni çap avadanlıqları quraşdırılıb.
Qeyd olunub ki, 2012-ci ildən istifadəyə verilən “Şərq qapısı” qəzetinin internet saytı bu ilin sentyabr ayında yenilənib. Qonaqlar qəzetin əməkdaşları ilə söhbət edib, burada yaradılan iş şəraiti ilə daha yaxından tanış olublar.
“Əcəmi” Nəşriyyat-Poliqrafiya Birliyində olan qonaqlara məlumat verilib ki, 1997-ci ildə yaradılan nəşriyyat 2010-cu ildə yeni binada yerləşdirilib və burada yüksək poliqrafik göstəricilərə malik Almaniya istehsalı olan çap avadanlıqları quraşdırılıb.
Naxçıvan Dövlət Teleradiosunda olan media nümayəndələrinə redaksiyalar, videoarxiv, dublyaj və montaj prosesi, efirə hazırlıq, çəkiliş pavilyonları, studiyalar, yayım texnologiyaları barədə ətraflı məlumat verilib. Diqqətə çatdırılıb ki, Naxçıvan Dövlət Radiosunun avadanlıqları da tamamilə yenilənib. Müasir səsyazma və yayım studiyalarına, geniş həcmli arxiv sisteminə və digər müasir radio texnologiyalarına malik radionun səsi internet üzərindən bu gün dünyanın istənilən nöqtəsində dinlənilir.
“Nuhçıxan” İnformasiya Agentliyi ilə tanışlıq zamanı diqqətə çatdırılıb ki, 2018-ci ilin may ayından fəaliyyətə başlayan agentlik vasitəsilə teleradio verilişlərinin internet üzərindən yayımı təşkil edilib. Agentliyin əsas fəaliyyət istiqamətləri muxtar respublika ilə bağlı ən mühüm hadisələr haqqında informasiyaları, şərh və rəyləri, analitik məqalələri, foto və videoinformasiyaları, rəsmi materialları beynəlxalq internet şəbəkəsi və sosial şəbəkələr vasitəsilə yaymaqdır. Qonaqlar televiziyanın digər redaksiyalarının fəaliyyəti ilə də yaxından tanış olub, Televiziyanın “Nuhçıxan” xalq çalğı alətləri ansablının çıxışını izləyiblər.
Naxçıvan Dövlət Televiziyasının “Günün sözü” verilişinin qonağı olan Ümumdünya Mətbuat Şuraları Assosiasiyasının rəhbəri Melek Sule Aker, Assosiasiyanın üzvü Nurhan Günsev, beynəlxalq media eksperti Nick Nvolisa, Azərbaycan Mətbuat Şurasının sədri Əflatun Amaşov, sədr müavini Umud Rəhimoğlu, Mətbuat Şurasının İdarə Heyətinin üzvü Vüqar Rəhimzadə onlayn medianın mövcud durumu, bu sahədəki narahatedici məqamlar, sosial şəbəkələrdən istifadə ilə bağlı fikirlər səsləndiriblər.
Sonra dillər əzbəri Batabatda olan qonaqlar buranın qış mənzərəsini, xüsusən də qarlı dağlarını böyük heyranlıqla izləyib, fotolar çəkdiriblər. Əsgərlərimizlə görüşən media nümayəndələri onlarla xatirə şəkli çəkdirib, ucqar dağlıq ərazilərdə yaradılan nümunəvi xidməti yüksək qiymətləndiriblər .
Duzdağ Fizioterapiya Mərkəzinə gələn qonaqlara mərkəzin fəaliyyəti haqqında geniş məlumat verilib. Bildirilib ki, insanların təbii yolla şəfa tapdığı bu səhiyyə ocağında yüksək xidmət şəraiti yaradılıb. Türkiyədən gələn pasiyentlər də burada ağciyər və yuxarı tənəffüs yolları xəstəliklərindən müalicə olunurlar.
Media nümayəndələri gəzinti çərçivəsində həmçinin, Möminə xatın və Açıq Səma Altında Muzey Kompleksi, Nuh Peyğəmbərin məzarüstü türbəsi və “Naxçıvanqala” Tarix-Memarlıq Muzey Kompleksində də olublar.
Turab Hacızadə
Nurlan Sadiqov