Gənclər hərbi xidmətə yola salınıb - FOTOLAR
NUHÇIXAN xəbər verir ki, Səfərbərlik və Hərbi Xidmətə Çağırış Üzrə Dövlət Xidmətinin Şahbuz və Sədərək Rayon şöbələrində və Naxçıvan şəhərində çağırışçıların hərbi xidmətə yola salınması mərasimi keçirilib. Tədbirlərdə çıxış edənlər gənclərin həvəslə və böyük ruh yüksəkliyi ilə hərbi xidmətə yola düşdüklərini vurğulayıblar.
Naxçıvan Muxtar Respublikası Ağsaqqallar Şurasının sədri Məmməd Məmmədov, Naxçıvan Muxtar Respublikası Gənclər və İdman nazirinin müavini Mirməcid Seyidov hərbi xidmətə yola düşən gənclərə xidmət zamanı ayıq-sayıq olmağı, sağ-salamat doğmalarının yanına qayıtmağı arzulayıblar.
Çağırışçılar adından çıxış edənlər də Vətənə layiqincə xidmət edəcəklərini və bu işin onlar üçün ən ali borc olduğunu bildirib, bu borcu şərəflə yerinə yetirəcəklərinə söz veriblər.
Sonda Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin rəisi, polkovnik-leytenant Daşqın Rəhimov çağırışçı gənclərə öz tövsiyələrini çatdırıb, hərbi xidmətə yollanmaları münasibətilə onları təbrik edib.
Ərhan Novruzov