Naxçıvandakı tələbələrdən etiraz: Onlar yayılan videoların təhrif olunduğunu bildirirlər - VİDEO
Tələbələr yaradılan şəraitə görə dövlət başçısına minnətdardırlar
Koronavirus pandemiyası ilə əlaqədar Türkiyədən qayıdan tələbə və vətəndaşlarımızın bir qrupu Naxçıvanda tibbi nəzarətdə saxlanılırlar. Onlar Naxçıvanda yaşayış qeydiyyatında olanlar yox, Bakı şəhərində və ölkəmizin bir sıra digər bölgələrində yaşayan vətəndaşlarımızdır. Sayları 300 nəfərə yaxındır. Onlar üçün lazımi saxlanılma, müayinə və qidalanma şəraiti yaradılsa da, ötən gündən etibarən bir sıra sosial şəbəkə hesablarında, xüsusən, Duzdağ Fizioterapiya Mərkəzindəki vətəndaşlarımızın saxlanılma şəraiti ilə bağlı yanlış, məqsədli və təxribat xarakterli informasiyalar yayılıb. Bu gün Naxçıvandakı tələbələr sosial şəbəkələrdə yayılan saxta və təxribat xarakterli videolara cavab olaraq video paylaşım ediblər. Və bundan əvvəl paylaşılan videolarda səslərinin montaj olunduğunu və məqsədli şəkildə təhrif edildiyini vurğulayıblar.
NUHÇIXAN həmin videoları təqdim edir:
Qeyd edək ki, dünən agentliyimizin saytında bununla bağlı məqalədə yerləşdirilib.
Duzdağa adi mağara kimi baxan mağara təfəkkürlülər - CAVAB
İctimaiyyətə artıq məlumdur ki, koronavirus pandemiyası ilə əlaqədar Türkiyədən qayıdan tələbə və vətəndaşlarımızın bir qrupu Naxçıvanda tibbi nəzarətdə saxlanılırlar. Onlar Naxçıvanda yaşayış qeydiyyatında olanlar yox, Bakı şəhərində və ölkəmizin bir sıra digər bölgələrində yaşayan vətəndaşlarımızdır. Sayları 300 nəfərə yaxındır. Onlar üçün lazımi saxlanılma, müayinə və qidalanma şəraiti yaradılsa da, ötən gündən etibarən bir sıra sosial şəbəkə hesablarında, xüsusən, Duzdağ Fizioterapiya Mərkəzindəki vətəndaşlarımızın saxlanılma şəraiti ilə bağlı yanlış, məqsədli və təxribat xarakterli informasiyalar yayılıb.
Qeyd etmək lazımdır ki, birincisi, Duzdağ ağ ciyər və onun iltihabi xəstəlikləri üçün dünya səviyyəli ən müasir təbii, dərmansız sanatoriyadı. Hər il 10 minlərlə turist və xəstə qəbul edir. Çoxu xarici ölkələrdən olan xəstələr burda müalicə üçün minlərlə manat vəsait ödəyirlər. Duz şaxtalarında hava təmiz və sterildir. Hətta cərrahiyyə əməliyyatxanalarının mikrob səviyyəsi belə Duzdağ şaxtalarının mühitində olandan yüksəkdir. Həm də duz mikrob əleyhinə ən yaxşı vasitədir.
Mərkəzin içərisində kafe, istirahət otaqları, xüsusi qadın, uşaq və kişi palataları, 400-dən artıq tibb çarpayısı var. Buranı adi mağara kimi qələmə verənlərin və bu videoları paylaşanların özü elə mağara təfəkkürlüdür. (Duzdağla bu linkdən tanış ola bilərsiniz). Görünür ki, onlar heç ölkəsini, onun təbii imkanlarını lazımi qədər tanımırlar. Və belə həssas bir məqamda insanların hissləri ilə oynayacaq qədər adidirlər.
İkincisi, mütəxəssislərin də dediyi kimi, gənclərin Duzdağda saxlanılmağı buranın mikroiqlimi və viruslara qarşı yüksək təsiri, eləcə də ağciyərin iltihabi xəstəliklərində ən yaxşı müalicəvi vasitə olmasındadır.
Hazırda tələbələri lazımı yoxlamadan keçirirlər və koronovirusla bağlı hər hansı narahatçılıqları olmadığı üçün onlar Duzdağda bir neçə gün nəzarətdə saxlanılacaqlar. Əgər narahatçılıq olsaydı, onların Naxçıvanın Yoluxucu Xəstəliklər Mərkəzində və başqa xəstəxanalarda müalicə olunması üçün ən müasir imkanlar yaradılıb və labaratoriya qurulub.
Fikirlərimi yazarkən, Naxçıvan Muxtar Respublikasının səhiyyə naziri Niyazi Novruzovla da söhbətləşmək imkanım oldu. Nazir bildirdi ki, Duzdağda saxlanılanlar müəyyən yoxlanılma və nəzarət prosedurlarından sonra öz yaşadıqları yerlərə yola salınacaqlar. “Şükür ki, Naxçıvanda koronavirusa yoluxma faktı yoxdur. Lazımi profilaktik və dezinfeksiya tədbirləri müntəzəm olaraq davam etdirilir. Muxtar respublikaya xarici ölkələrdən giriş dayandırılıb. Ahıl və xüsusi qayğıya ehtiyacı olanlara evlərində sosial xidmətlər göstərilir. Naxçıvanın xəstəxanaları da ən müasir səviyyədədir və lazımi imkanlara malikdir”- deyə səhiyyə naziri bildirdi.
Görünən odur ki, dəqiqləşdirilməmiş, yalan informasiyalar paylaşıb saxta vətənpərvərlik edənlər ölkəmizə və onun Naxçıvan Muxtar Respublikasına qarşı açıq-aşkar təxribatçılıq törədənlərdi və bu təxribatlara görə qanun qarşısında məsuliyyət daşıyırlar.
...Biz, tələbələri başa düşürük, narahatdırlar, neçə gün yollarda olublar, həssas dönəm keçirirlər... Sual olunur, bəs, sizə nə gəlib ay, feyzbuk “qəhrəmanları”, ay, “beşinci kalon” “pəhləvanları”?!
Yeri gəlmişkən, xüsusi vurğulamaq istərdim ki, srağagün Naxçıvan Ali Məclisində dünyada pandemiya elan olunan virusun muxtar respublika ərazisində yayılmasının qarşısının alınması ilə bağlı tədbirlərə həsr olunmuş müşavirə keçirilib və bununla bağlı lazımi tapşırıqlar verilib. Müşavirədən sonra Ali Məclis Sədrinin Fərmanı ilə “Naxçıvan Muxtar Respublikasında Koronavirusla Mübarizəyə Dəstək Fondu” yaradılıb və fondun xəzinə hesabı açılıb. Təkcə dünən fonda muxtar respublikanın sakinləri, dövlət və özəl müəssisələrinin əməkdaşları tərəfindən 1 milyon manata yaxın vəsait köçürülüb.
Ona görə də vətəndaşlarımızı həssas dönəmdə məqsədli şəkildə yayılan belə təxribat xarakterli yalan informasiyalara aldanmamağa, onları paylaşmamağa çağırırıq. Unutmayaq ki, bir yalnış informasiya minlərlə insanın psixologiyasını, həyat tərzini dəyişə, inamını itirə bilər. Çalışaq informasiyaları rəsmi və qərəzssiz mənbələrdən alaq...
Sahil Tahirli