Azərbaycan mətbuatının flaqmanı
Azərbaycan mətbuatı tarixində xüsusi yer tutan “Molla Nəsrəddin” jurnalının nəşrə başlamasından 114 il ötür. Böyük demokrat ədibimiz Cəlil Məmmədquluzadənin redaktorluğu ilə çıxan bu jurnalın ilk sayı 1906-cı ilin 20 aprelində Tiflisdə işıq üzü görübdür. “Molla Nəsrəddin” qısa fasilələrlə 25 il nəşr olunub. Jurnalın ümumilikdə 748 sayı işıq üzü görüb, o cümlədən 1906-1917-ci illərdə Tiflisdə 340, 1921-ci ildə Təbrizdə 8, 1922-1931-ci illərdə isə Bakıda 400 nömrəsi çapdan çıxıbdır.
Bütün varlığı ilə xalqa, vətənə bağlı olan redaktorun: “Sizi deyib gəlmişəm, ey mənim müsəlman qardaşlarım!” - xitabı ilə fəaliyyətə başlayan “Molla Nəsrəddin” jurnalı qısa müddətdə böyük nüfuz qazanıb, təkcə Azərbaycanda deyil, bütün Yaxın və Orta Şərqdə demokratik mətbuatın, ədəbiyyatın, mədəniyyətin, ictimai fikrin inkişafına mühüm təsir göstərib, bu sahədə yeni mərhələ yaradıb.
“Qələmin müqəddəs vəzifəsi xalqın xoşbəxtliyi yolunda xidmət etməkdir. Bu ola gərək hər bir qələm sahibinin amalı”-deyən ustad Mirzə Cəlilin bu sözləri təkcə onun öz yaradıcılığı üçün deyil, bütövlükdə “Molla Nəsrəddin”çilərin əsl fəaliyyət devizi idi. Doğrudan da, ötən yüzilliyin ilk onilliklərində Azərbaycanda milli şüurun oyanışında, xalqın özünü dərk etməsində, hüquqları, istiqlalı uğrunda mübarizəyə hazırlanmasında “Molla Nəsrəddin” jurnalı çox mühüm rol oynayıbdır.
“Molla Nəsrəddin” jurnalı başda Mirzə Cəlil olmaqla o dövr Azərbaycan ziyalılarının böyük bir qisminin yaradıcılıq fəaliyyətinn parlaq bəhrəsi, şah əsəri idi. C.Məmmədquluzadə bu barədə obrazlı şəkildə belə deyirdi: “Molla Nəsrəddin” tək bir nəfər müəllifin əsəri deyil. “Molla Nəsrəddin” bir neçə mənim əziz yoldaşlarımın qələmlərinin əsərinin məcmuəsidir ki, mən də onların ancaq ağsaqqal yoldaşıyam”. Xalqın üzləşdiyi sosial-siyasi, iqtisadi və mədəni problemləri satirik üslubun imkanları vasitəsilə, sadə, anlaşıqlı tərzdə oxuculara çatdıran Mirzə Cəlil və onun Mirzə Ələkbər Sabir, Ömər Faiq Nemanzadə, Əli Nəzmi, Əliqulu Qəmküsar, Əbdürrəhim bəy Haqverdiyev, Məmməd Səid Ordubadi, Əli Razi Şamçızadə və s. kimi məslək yoldaşları bütün fəaliyyətləri boyunca Vətənə, millətə layiqincə xidmət göstəriblər. Xalqın milli mənafelərinin ardıcıl ifadəçisi və müdafiəçisi olan “Molla Nəsrəddin” azadlıq mücadiləsinə, xalqımızın hərtərəfli yüksəlişinə misilsiz töhfələr veribdir. Jurnalı Mirzə Cəlil dühasının parlaq ifadəsi sayan ulu öndərimiz bütövlükdə “Molla Nəsrəddin”çilərin milli tərəqqiyə göstərdikləri çoxşaxəli xidmətləri yüksək qiymətləndirərək deyibdir: “Cəlil Məmmədquluzadə dühası “Molla Nəsrəddin” jurnalında öz əksini tapdı. “Molla Nəsrəddin”, onun vasitəsilə Cəlil Məmmədquluzadə və jurnalın işinə cəlb olunmuş Azərbaycanın başqa mütəfəkkir adamları xalqımızın milli şüurunun formalaşmasında, milli ruhunun yüksəldilməsində, milli oyanışında böyük rol oynadılar”.
Dahi rəhbər “Mollanəsrəddin”çilərin öz fəaliyyətləri və yaradıcılıqlarında milliliklə bəşəriliyin üzvi vəhdətinə nail olmalarını da xüsusi qiymətləndiribdir. Mirzə Cəlilin nəşr etdirdiyi ”Molla Nəsrəddin” jurnalının sadə xalq dilində yazmasını məxsusi dəyərləndirən ümummilli liderimiz rabitənin zəif olduğu XX əsrin əvvəllərində bu mətbuat orqanının böyük sürətlə yayılmasının səbəbini də məhz onun yüksək ideya-bədii dəyərə malik olması ilə əlaqələndiribdir: “Molla Nəsrəddin” jurnalı dünyada məşhurdur. O vaxtlar rabitənin çox zəif olmasına baxmayaraq, “Molla Nəsrəddin” jurnalı dünyanın bir çox ölkələrində yayılırdı, hörmətlə qarşılanırdı, oxunurdu və hər yerdə öz təsirini göstərirdi. Azərbaycanın həyatında “Molla Nəsrəddin” jurnalının xüsusi yeri vardır. O dövrün şəraitinə uyğun olaraq Cəlil Məmmədquluzadə “Molla Nəsrəddin” jurnalını xalqın əksər təbəqələri üçün oxuna bilən, anlaşıqlı səviyyədə nəşr edirdi”.
Görkəmli dövlət xadimi Heydər Əliyev “Molla Nəsrəddin”çilərin mühüm xidmətləri sırasında ana dilinə böyük məhəbbətlərini, onun saflığının, təmizliyinin qorunması yolunda fədakar, ardıcıl səylərini xatırlatmış, jurnalda Mirzə Cəlilin ön mövqeyə çəkdiyi “Vətən, millət, dil” amalına yüksək qiymət verərək deyibdir: “Cəlil Məmmədquluzadənin fəaliyyətində ən dəyərli cəhətlərdən biri də Azərbaycan xalqının dilinin inkişafı üçün göstərdiyi xidmətlərdir. Onun daim işlətdiyi “Vətən, Vətən, Vətən! Millət, millət, millət! Dil, dil, dil!” sözləri xalqımızın, millətimizin arzularını ifadə edir. Ədibin ana dilinə – Azərbaycan dilinə böyük diqqəti, ana dilini təbliğ etməsi, insanların hamısını ana dilini bilməyə səsləməsi və ana dilinin, Azərbaycan dilinin hər yerdə hökm sürməsinin zəruriliyinə dair fikirləri, yazıları o vaxt üçün vacib idi, bu gün üçün də çox aktualdır”.
“Molla Nəsrəddin”çilər Azərbaycanda eyniadlı ədəbi məktəbi yaradıb, bu mətbuat orqanı ətrafında Mirzə Cəlilin rəhbərliyi ilə cəmləşmiş ədiblər ötən əsrin ilk onilliklərində ədəbiyyatımızın ən geniş və aparıcı ədəbi cərəyanı olan tənqidi realizmi formalaşdırıb və inkişaf etdiblər. Bu ədəbi cərəyan ədəbiyyatımızın hərtərəfli yüksəlişində, yeni mövzu və ideyalarla, janr və üslublarla zənginləşməsində böyük rol oynayıbdır.
“Molla Nəsrəddin” jurnalı rəssamlığın, karikatura sənətinin inkişafına da geniş meydan açıb. Jurnaldakı dərin mənalı yazılarla diqqətəlayiq karikaturalar vahid məqsədə xidmət edib, həm yazarlar, həm də rəssamlar ideya-sənətkarlıq baxımından bir-birini uğurla tamamlayıb.
“Molla Nəsrəddin” jurnalı Azərbaycan mətbuatı tarixində yeni bir səhifə açıb, satirik publisistikanın inkişafında böyük rol oynayıbdır. Bu jurnalın təsiri ilə nəşr olunan “Kəlniyyət”, “Arı”, “Tuti”, “Babayi-Əmir”, “Şeypur”, “Zənbur” kimi satirik mətbuat orqanları onun ənənələrini davam etdiriblər. Ümummilli liderimiz Heydər Əliyev bu məsələyə də diqqət yetirib, “Molla Nəsrəddin”in bütün zamanlarda öz aktuallığını saxlamasına böyük önəm vermiş, mətbuatda onun ənənələrinin davamını və inkişafını vacib sayıbdır. Ümumiyyətlə, ulu öndər Heydər Əliyev zamanın, dövrün ən mürəkkəb sınaqlarından mərdliklə çıxaraq heç vaxt öz amalından, xalqa xidmət yolundan dönməyən “Molla Nəsrəddin”çilərin fəaliyyətinə, zəngin yaradıcılıq irsinə həmişə böyük qiymət verib.
Müstəqil Azərbaycanda bütün sahələrdə olduğu kimi, ədəbiyyat və mədəniyyətə qayğı istiqamətində də ümummilli liderimizin siyasi kursu uğurla davam etdirilir. O cümlədən Mirzə Cəlilin və digər “Molla Nəsrəddin”çilərin irsinə də xüsusi diqqət yetirilir, böyük qayğı göstərilir. 2006-cı ildə “Molla Nəsrəddin” jurnalının nəşrə başlamasının 100 illiyinin dövlət səviyyəsində qeyd olunması, 2009-cu ildə C.Məmmədquluzadənin 140 illik, 2019-cu ildə 150 illik yubileylərinin, həmçinin digər “Molla Nəsrəddin”çilərin yubileylərinin keçirilməsi barədə ölkə Prezidenti cənab İlham Əliyevin imzaladığı Sərəncamlar məhz ulu öndər Heydər Əliyevin möhtəşəm siyasətinin uğurlu davamının təzahürüdür. “Molla Nəsrəddin” jurnalının bütün saylarının toplanılıb transliterasiya edilərək çoxcildlik nəşrinin başa çatdırılması da bu baxımdan xüsusi dəyərə malikdir.
Naxçıvan Muxtar Respublikasında da Mirzə Cəlilin və digər “Molla Nəsrəddin”çilərin xatirəsi uca tutulur, ehtiramla yad edilir. Bu istiqamətdə həyata keçirilən çoxsaylı tədbirlər, hazırlanan nəşrlər, təşkil olunan elmi konfranslar, tamaşaya qoyulan əsərlər, keçirilən “Mirzə Cəlil günləri” “Molla Nəsrəddin”çilərin yaradıcılıq irsinə ümummilli liderimiz Heydər Əliyevin göstərdiyi böyük diqqətin, verdiyi önəmin muxtar respublikamızda layiqincə davam etdirilməsinin əyani təcəssümüdür.
Naxçıvan Muxtar Respublikası Ali Məclisi Sədrinin 2017-ci il 28 avqust tarixli Sərəncamı ilə təsdiq edilmiş “Oxunması zəruri olan kitabların Siyahısı”na görkəmli ədibin “Hekayələr”i də daxil edilmişdir. 2009-cu ildə isə ədibin 140 illiyi münasibətilə Naxçıvanda “Əcəmi” Nəşriyyat - Poliqrafiya Birliyində “Seçilmiş əsərləri” iki cilddə nəfis tərtibatla çap olunubdur.
Görkəmli yazıçı Cəlil Məmmədquluzadənin Naxçıvan Muxtar Respublikasında xatirəsi əbədiləşdirilib, Naxçıvan şəhərində onun əzəmətli heykəli ucaldılıbdır. Naxçıvan Dövlət Musiqili Dram Teatrı, Naxçıvan Muxtar Respublika Ədəbiyyat Muzeyi onun adını daşıyır. Ölməz yazıçının Naxçıvan şəhərində ev-muzeyi, Şərur rayonunun Cəlilkənd kəndində və Babək rayonunun Nehrəm kəndində Xatirə muzeyləri fəaliyyət göstərir.
“Molla Nəsrəddin” ədəbi məktəbinin ənənələri, mollanəsrəddinçilik təlimi bundan sonra da yaşamaqda davam edəcək, inkişafa, tərəqqiyə özünün böyük və təmənnasız köməyini göstərəcəkdir.
Hüseyn Həşimli
AMEA Naxçıvan Bölməsi İncəsənət,
Dil və Ədəbiyyat İnstitutunun direktor müavini,
əməkdar elm xadimi, professor