Günün şeiri...

Bu gün 15 iyun - Milli Qurtuluş Günüdür. NUHÇIXAN İnformasiya Agentliyi Azərbaycan Yazıçılar və Jurnalistlər Birliyinin üzvü İbrahim Yusifoğlunun "Qurtuluş" poemasından bir parçanı təqdim edir:

QURTULUŞ

Poemadan parçalar

 

Çaylar, göllər, dənizlər yox,

Kükrəyirdi okeanlar.

Azərbaycan yaşayırdı

Fırtınada qorxunc anlar.

 

Dalğaların uğultusu

Yayılmışdı çox ellərə.

Okeanın açar-pultu,

Verilmişdi yad ellərə.

 

Qorxu, hədə harayında

Millət yaman bayılmışdı.

Tam günahsız bir məmləkət

Cinayətkar sayılmışdı.

 

Yurdumuza gələn bəla

Qəlb ağrıtdı, sinə dəldi.

Anaların ağısından

Göy ağladı, yer kövrəldi.

 

Kimsə....

Kimsə öz xalqının

Harayına yetməliydi.

Zil qaranlıq gecələrdə

Ömrü mayaq etməliydi.

Dalğaları yara-yara

Azadlığa getməliydi.

 

İmperiyanın buxovunu

Mərd bir oğul qırıb atdı.

Öz xalqının harayına

Ulu Öndər Heydər çatdı

 

....Gəldi doğma Bakısına,

Yollar, izlər sökülmüşdü.

Sanki qorxunc zəlzələdən,

Hər şey çölə tökülmüşdü

 

...Gəldi doğma Bakısına,

Yaşamağa yer istədi-

Vermədilər!..

Söyləməyə söz istədi!-

Vermədilər!..

Bir şəhəri tikən memar

Evsiz qaldı.

Yüz cilidlər yazan yazar

Sözsüz qaldı.

 

Nadanların nadanlığı

Yaman ağır gəldi ona.

Səmaları yarıb gəldi

Ana yurdu Naxçıvana!

 

Onun qəfil gəlişindən

Yer üzünə ələndi zər.

Peyğəmbər tək qarşılandı

Naxçıvanda Ulu Heydər.

 

Yamancana sarsılmışdı

İnsanların hallarına.

Onlar tezcə dönməliydi

Öz işıqlı yollarına

 

İmdad gəzən dərdli gözlər

Dikilmişdi gözlərinə.

Öndə görüb xilaskarı

Gəlmişdilər özlərinə.

 

Ən böyük dərd- Naxçıvanı,

Etmişdilər yalqız ada.

Yerdə-göydə bu diyarı,

Bürümüşdü blokada!

 

Rəhbər kimi yaşamaq da,

Naxçıvanda çətin idi.

Ulu Heydər öz işində

Bütöv idi mətin idi.

 

 

Dünya artıq nəzərini

Yönəltmişdi Naxçıvana.

O dahinin iradəsi

Son qoyurdu nahaq qana.

 

Az zamanda el səsini

Gur səsilə səsə qatdı.

Qorxuları, yalanları,

Ürəklərdən silib atdı.

 

Bu azadlıq savaşında,

Yol yox idi daha geri.

Naxçıvan da məhv olurdu,

İmperiya – SSRİ!

 

 

Dədə Heydər seçimində

Haqq, ədalət yolun seçdi.

Blokada sipərini

Siyasətlə yarıb keçdi.

 

Qardaş əli yetməyibdi

Qardaşına yüz il bəri.

Min ümidlə saldırdı o

Araz üstə körpüləri.

 

 

Tanrımızın duasıyla

Neçə bağlı yollar açdı.

Naxçıvanın səmasında,

İşıq oldu, işıq saçdı.

 

Bəd xəbərlər yazılırdı,

Gözlənirdi qırğın hər an.

Gizli, aşkar bölünürdü

Neçə yerə Azərbaycan.

 

Sanki bizə bəs deyildi

Qarabağın qara baxtı

Bir qardaşın gülləsiylə

Bir qardaşın qanı axdı.

 

Vətənin hər bölgəsində

Yad tonqallar çatılmışdı.

Hərə bir cür duşub tora,

Döyüşlərə qatılmışdı.

 

Bakı coşub hayqırırdı:

-Bunu hamı bilməlidir,

Bu ölkəni yaşatmağa

Yalnız Heydər gəlməlidi!

 

Ulu Heydər gəlməlidi,

Bütün səddi yıxmalıdı.

Azərbaycan xoş günlərə-

Qurtuluşa çıxmalıdı.

 

Xalqın iradəsi zülməti yardı,

Mavi göylərinə zər taxtı Bakı.

İstiqlal məşəli köksünü sardı,

Müstəqil dövlətin paytaxtı Bakı!

 

Fərsiz siyasəti rəhbər bəylərin,

Məhvə apardı azadlıq ləli.

Elin xəzər boyda istək səyləri.

Bakıya gətirdi uca Heydəri

 

Bu qəfil gəlişdən qara qüvvələr,

Qara əməllərdən qorxdu,dayandı.

Qəlblərdə buzlaşmış soyuq ürəklər,

Azadlıq eşqiylə alışıb,yandı.

 

Dəyişdi görkəmi şəhər,kəndlərin,

Yayıldı ellərə şöhrəti, şanı.

Elə ovsunladı incik qəlbləri,

Qoymadı bölünsün Azərbaycanı.

 

Onun büllur kimi əməllərindən,

Çeşmələr çağladı, çaylar duruldu.

Xalqın vətən sevər igidlərindən,

Yenilməz, əyilməz ordu quruldu.

 

Mərkəzdə ,ən uzaq dağ kəndlərində

Məktəblər tikdirmək istək-səyidi.

Bir inam var idi, geniş qəlbində.

Təhsil millətin gələcəyidi.

 

İdman yarışları,olimpiada,

Bizi qovuşdurdu xoş çağımızla.

Dünyanı titrədən çox yarışlarda

Ucaldı himnimiz,bayrağımızla.

 

Bütün arzular çin olubdu,çin,

Bir qüdrət var idi imza-qolunda.

Olsa da bir qədər əzablı,gərgin,

Bir həyat başladı,ipək yolunda.

 

Zəhməti bar verdi Ulu öndərin,

Dünya heyran qaldi “Bakı-Ceyhan”a.

Xəzərdən uzanan qaz kəmərləri

Bərəkət bəxş etdi bütöv cahana.

 

İllərlə həllini tapmayan işlər,

Heydər zəkasıyla tapdı həllini.

Onunla baş tutan rəsmi görüşlər.

Dünyaya tanıtdı doğma elini.

 

Müstəqil dövlətin mərd prezidenti

Ali kürsülərdən yaydı səsini.

Öz doğma dilində tam kəskin,qəti,

Bəşərə çatdırdı haqq kəlməsini.

 

Bu gün son mənzili fəxri xiyaban,

Qərq olub əbədi çiçək ətrinə.

O Günəş ömrünü dünyaya yayan,

Dönübdür şerimin qızıl sətrinə.

 

Bir insan ömründən söz açıram mən,

O,mavi göylərdən  enməyəcəkdir.

Əbədi bir ömür alıb Günəşdən-

O,Heydər ömrüdür sönməyəcəkdir!