Al şəfəqli məmləkətim - Naxçıvan
Deyirlər hər kəsin Vətən adlı bir dünyası var. Bəlkə elə buna görə də, dünyada hər şeyi zövqə, imkana görə dəyişmək olar, bircə Vətəndən başqa...Vətən tale töhfəsidir, Vətən bəşər övladının şanı-şərəfi, qeyrəti, namusudur... Bütün sevinclərimizin əzəli də ona bağlıdır, axırı da...
Böyüyüb boya-başa çatdığım yurdum, bol günəşi, saf suyu, təmiz havası ilə göz oxşayan gözəlliklər məskənim, Naxçıvanım. Əlincə qeyrətlim, Gəmiqaya sirlim, Əshabi-Kəhf möcüzəlim, Möminə Xatın şöhrətli qədim diyarım...
Ana yurdum Azərbaycandan ayrı düşmüş ayrılmaz parçadır Naxçıvan! Dünya şöhrətli siyasi xadim, ulu öndərimiz Heydər Əliyevin, Vətən həsrətli Heyran xanımın, maarif fədaisi Məhəmməd Tağı Sidqinin, romantik şair Hüseyn Cavidin, ölməz sənətkar Cəlil Məmmədquluzadənin, tarixi romanlar müəllifi Məmməd Səid Ordubadinin, böyük kimyaçı alim Yusif Məmmədəliyevin və neçə-neçə adını çəkmədiyim böyük şəxsiyyətlərin vətənidir Naxçıvan.
Mən sənin Batabat gölündəki möcüzəli “Üzən ada”nı, Duzdağındakı “Büllur sarayı”nı, Darıdağ şəfa bulağını, min bir dərdə dava olan mineral sularını, yayın od ələyən günlərində ilin dörd fəslini başına cəm eləyən Ordubadın “Göy göl”ünü, milli ruhumuzu özündə yaşadan Şərur yallısını göz önünə gətirdikcə gözümdə daha da gözəl və doğma görünürsən, ulu diyarım...
Naxçıvan xalqımızın tarixində və taleyində mühüm rol oynayan bir məkandır. Əbəs yerə vətənimizin bu qədim və ulu diyarını “Nəqşi-cahan”-dünyanın bəzəyi adlandırmayıblar. Dərbənddən Bakıya, oradan da Qarabağa çatan yollar Zəngəzur vasitəsilə Naxçıvandan keçərək İrəvana və Tiflisə, Qarsa və Ərzuruma qədər uzanıb gedibdir.
Dünənlə bu günün vəhdəti
Necə xoşbəxtik ki, qanlı-qadalı günləri geridə qoyub, xoş işıqlı, nur üzlü şəhərdə günün batışını və günün oyanışını seyr edə bilirik. Vaxtilə Naxçıvan zülmətin pəncəsində, qaranlıqda qalmışdı. Ancaq bu diyarın xalqsevər rəhbərləri, qədirbilən oğulları, yurdsevər vətəndaşları zülmətə, qaranlığa qarşı mübarizəyə başladı, bu yolda böyük zəhmətlər, əziyyətlər çəkildi və nəticədə Naxçıvan gecələri nur işığına boyandı.
Şairin təbiri ilə desək:
Qocaman çinarlar durub yan-yana
Köksündən zəhmətin xoş ətri saçır.
Dönübdür şəhərim cənnətməkana
Baxdıqca göz gülür, könül dil açır.
Qədim diyarımın hər qarışı göz oxşayır, sanki dil açıb danışır. Tarix Naxçıvanı, Naxçıvan da tariximizi yaşadır. Ulu öndərimiz Heydər Əliyev deyirdi: “Naxçıvan Azərbaycanın ən qədim diyarlarından biridir, çox zəngin tarixə malik olan Azərbaycanın bir hissəsidir, qədim tarixi olan Azərbaycan torpağıdır”.
Arzularımın diyarı....
Hələ balacaydım... Uşaq xəyallarım vardı. Hər zaman arzu edərdim ki, hər cür şəraiti olan məktəblərdə təhsil alaq, gül-çiçəyə qərq olmuş meydanlarda uşaqlarla oynaya bilək. Bu arzular, uşaq xəyallarımdakı niyyətlər çox keçmədi ki, gerçək oldu. Sanki hansısa bir sehrbaz öz sehrli çubuğu ilə Naxçıvanı əsrarəngiz gözəlliyə qərq etdi.
İndi Naxçıvan-Azərbaycanın tacı olan bu tarixi məkan özünün yeni həyatını yaşayır. Müasir tikililərlə yanaşı, yenidən böyük ustalıqla və diqqətlə bərpa olunaraq müasir dizaynda qurulmuş binalar, mədəniyyət və istirahət parkı, əyləncə və istirahət mərkəzi, Bazar gölü, “Saat Meydanı” turistik istirahət mərkəzi, Uzunoba ailəvi istirahət mərkəzi, kinoteatrlar, kafe və restoranlar, küçələr boyu əkilmiş yamyaşıl ağaclar, insanların əhval-ruhiyyəsini oxşamaqla yanaşı, ətrafa xoş ətir saçan gül-çiçəklər - bütün bunların hamısı blokada şəraitində yaşayan Naxçıvanı inanılmaz dərəcədə dəyişib. Bu ilk növbədə Ümummilli liderimizin ideyalarının təntənəsidir, onun quruculuq yolunu inamla davam etdirən ölkə başçısı İlham Əliyevin muxtar respublikaya göstərdiyi qayğının bariz nümunəsidir. Bu təntənə müasir Naxçıvanın gerçək simasıdır.
Uğurlu sabahlara doğru…
Hər bir valideynin arzusu övladının rahat həyat tərzi sürdüyünü, xoş günlər içərisində gələcəyə doğru inamla addımladığını görməkdir. Bu gün nə xoş bizə ki, övladlarımızı heç tərəddüd etmədən məktəbəqədər tərbiyə müəssisələrinə və hərtərəfli şəraitlə təmin olunmuş təhsil ocaqlarında təhsil almağa göndərə bilirik. Bəli, gələcəyimiz olan gənclər artıq əmin əllərdə böyüyüb təhsil alır, çalışır, səmərəli fəaliyyət göstərməsi üçün hər cür şərait yaradılır. Bugünkü gənc nəsil sabaha uğurla, inamla addımlayır. Bütün bu uğurlar isə biz naxçıvanlıları qədim məmləkətimizə daha sıx, qırılmaz tellərlə bağlayır. Ümummilli liderimiz Heydər Əliyev doğma Azərbaycanımız haqqında, Naxçıvan haqqında düşünür və deyirdi: “İstəyirəm ki, mənim arzum, istəklərim, Azərbaycan dövləti haqqında müstəqil Azərbaycanın gələcəyi haqqında və Azərbaycanın ayrılmaz hissəsi olan Naxçıvan haqqında planlarımız, arzularımız yerinə yetirilsin”. Qürur hissi ilə deyə bilərik ki, bu arzu, bu istək Naxçıvanda dönmədən gerçəkləşdirildi, ulu öndər ideyalarının reallığa çevrildiyi bir məkana döndü. Qədim Naxçıvanımızın bugünkü müasir səviyyəsi cənab Sədrimizin yorulmaz fəaliyyətinin canlı ifadəsidir.
İndi bu şəhəri seyrə çıxan hər bir vətəndaş çıraqban şəhərə baxıb iftixarla: “Mən bu şəhərin sakiniyəm”,- deyir.
Yaşıllıqlar məskənidir məkanım...
Doğma diyarımızın bugünkü göz oxşayan yaşıllıqlarını seyr etdikcə şəhərimin keçdiyi, hələ mən balacaykən yaddaşıma yazılan o çətin günləri göz önümdə canlanır. Qışda soyuqdan qorunmaq üçün şəhərimizdə kimsəsiz, qərib kimi görünən beş-on ağacı kəsib istisinə qızındığımız, yayda isə: “kaş ki, indi həmin ağaclar qalardı, kölgəsində sərinlik tapardıq”,- dediyimiz vaxtları indi ürəkağrısı ilə xatırlayıram. Muxtar respublikamızın yaşıl sərvətinin dağıdılmasından narahat olan və onu qorumağa çağıran ulu öndərimiz deyirdi: “Ağac kəsən hər kəs elə bil mənim qolumu kəsir”. Bu sözlər muxtar respublikanın əhalisi üçün bir həyəcan təbili idi. Bu yaşıllığı qorumağa və onu mühafizə etməyə bir çağırış idi. Bu çağırışa elliklə qoşulmaq, ona səs vermək, qırılıb tökülənlərin, dağıdılanların əvəzini qaytarmaq lazım gəlirdi. Ancaq necə?Bu çətin işin öhdəsindən gəlmək mümkün idimi? Axı muxtar respublikada yaşıllıqların istismarı bir yana dursun, iqtisadi tənəzzül də bir tərəfdən insanların əl-qolunu bağlamış, sabaha olan ümidlərini puça çıxarmışdı. Belə bir çətin məqamda Heydər Əliyevin böyük dövlətçilik təcrübəsi həlli çətin olan məsələləri öz yoluna qoya bildi. Həyat yavaş-yavaş öz axarına düşməyə başladı. Yaşıllaşdırma ilə bağlı layihələrin həyata keçirilməsinə böyük önəm verildi. Muxtar respublikamızı yaşıl diyara çevirmək üçün hər il yol kənarlarına on minlərlə ting basdırıldı. Ancaq şükürlər olsun ki, o ağrılı, qadalı günlər geridə qalıb və bu gün yaşıllıqlarımız, ağaclarımız göz oxşayır.
Muxtar diyarımızın yaşıllıq əraziləri ilbəil artırılır, meşə-bərpa işləri sürətləndirilir. İlin bütün fəsillərində yaşıl libaslı zəhmətkeş bağbanları şəhərimizin gəzməli-görməli yerlərində mövsümə uyğun işlər apararkən görmək olar. Bu diyara üz tutan qonaqlar da məhz bu gözəllikdən zövq alır və qədim diyarımızın hüsnünə yaraşıq verən yaşıllıqlardan ağızdolusu danışırlar.
Aydın məram, konkret hədəf
Qısaca bunu deməliyəm ki, o yerdə Vətənə, yurda bağlı əsl rəhbər vardırsa, o zaman həyatın məcrası da düzgün istiqamətə yönəlir, sözlə işin vəhdəti təmin edilir, nizam-intizam şüurlu olaraq varlığımza hakim kəsilir. Bütün bunlar isə sürətli inkişafa gedən yolun başlıca şərtidir. Çalışmaq və yenə də çalışmaq bugünkü həyatımızın alternativsiz qayəsidir. Atalar yaxşı deyib: “Halva-halva deməklə ağız şirin olmaz.” Gərək arzusunda olduğun məqsədə çatmaq üçün qol çırmayıb iş görəsən. Dünya şöhrətli siyasətçi, misilsiz dövlət xadimi Heydər Əliyevin idarəetmə məktəbini keçən, onun dövlətçilik xəttinin incəliklərini mənimsəyən, muxtar respublikanı dərindən tanıyan, potensialını və problemlərini yaxşı bilən, təşəbbüskar, coşqun enerjili, aydın proqramlı muxtar respublika rəhbəri öz məramnaməsini hələ 25 il öncə belə ifadə etmişdi: “Prezident Heydər Əliyevin dövlətçilik platformasına sadiq qalacağam, onun bu böyük etimadını layiqincə doğrultmağa çalışacağam”.
Aydın məram, konkret hədəf isə göz qarşısındadır. Özünün intibah dövrünə qədəm qoyan Naxçıvanda bu gün yeni həyat başlayıb. İnkişaf və yeniləşmə istiqamətində keçilmiş şərəfli yolun dərsləri, dövlətçilik, quruculuq, idarəetmə sahəsində toplanmış zəngin təcrübə Azərbaycanın bu qədim və həmişəcavan diyarının sabahkı üfüqlərinə də gur işıq salır.
Nuray Əsgərova