Vətən kiçilməsin deyə dönüb olur Vətən şəhid - Emin Sadiqov - VİDEO
Ölümündən sonra Azərbaycan Respublikası Prezidenti tərəfindən “Vətən uğrunda”, “Füzulinin azad olunmasına görə” və “Döyüşdə fərqləndiyinə görə” medalları ilə təltif olunan 22 yaşlı şəhid leytenant Emin Sadiqov Vətən müharibəmizin fədailərindən biri idi.
Şəhid Emin Sadiqov 1998-ci ildə Şahbuz rayonunda doğulur. Orta təhsilini Naxçıvan şəhərində alan Emin kiçik yaşlarından ata qayğısından məhrum olur. Atasını vaxtsız itirməsi onu həyata qarşı daha mübariz edir, anasına, Vətənə bağlı bir övlad kimi böyüyür. 2012-ci ildə yurd, vətən eşqi ilə Heydər Əliyev adına Hərbi Liseyə üz tutur. Hərbi təhsilini Heydər Əliyev adına Ali Hərbi Akademiyada müvəffəqiyyətlə tamamlayan Şəhidimiz 2019-cu ildə Qazax rayonunda Milli Ordunun zabiti kimi şərəfli xidmətinə başlayır.
Vətən müharibəsi başlayan zaman onun qarşısında 2 seçim olur. Həyatda yeganə varlığı və hər kəsdən çox sevdiyi anası, bir də canından belə üstün tutduğu Vətəni. O, təbii ki, Vətəni qorumağı özünə borc bilir. Tibb bacısı olan anasından halallıq aldıqdan sonra vəzifə borcunu yerinə yetirmək üçün könüllü olaraq cəbhəyə yollanır.
Oktyabrın 6-da haqq savaşımıza qatılan Emin döyüşlərdə yaralanmağına baxmayaraq, rəşadətlə sona kimi mübarizə aparır. Mənfur düşmənin xeyli sayda canlı qüvvəsini məhv edir, Füzuli, Hadrut, Suqovuşan və bir neçə yaşayış məntəqələrinin azad edilməsində əsl şücaət göstərir. Oktyabrın 26-da Füzulinin Alxanlı kəndi istiqamətində şəhadətə yüksəlir. Şəhidlik məqamına yüksəlmək qürurunu anasının yuxusuna gələrək məhz özü deyir.
Gözün arxada qalmasın, cənab leytenant Sadiqov. Vətənə sənin kimi igid övlad yetişdirməyin qürurunu yaşayan anan indi bütün Azərbaycanın anasıdır. Bütöv və azad Azərbaycanın!
NUHÇIXAN İnformasiya Agentliyi Naxçıvan televiziyasının əməkdaşlarının şəhid Emin Sadiqovla bağlı hazırladığı videomaterialı təqdim edir:
Elnurə Tahir