Şərur şəhərində Saat Meydanının tikintisi yekunlaşmaq üzrədir
Muxtar respublikada həyata keçirilən genişmiqyaslı tikinti-quruculuq tədbirləri Şərur rayonunu da əhatə edib.
NUHÇIXAN İnformasiya Agentliyi xəbər verir ki, rayondakı yeni quruculuq ünvanlarının sırasına Şərur şəhərinin girişində ucaldılan Saat Meydanı da qoşulub. Ümumi sahəsi 2 min 460 kvadratmetr olan ərazidə 10 metr hündürlükdə olacaq Saat qülləsinin inşasını “Gəmiqaya Holdinq” Şirkətləri Qrupu həyata keçirir.
Meydandakı qüllədə şərq və qərb istiqamətlərində olmaqla, 2 saat qurulacaq. Tikinti ilə paralel şəkildə ərazidə işıqlandırma sistemi quraşdırılır, su xətti çəkilir.
Layihəyə uyğun əsas işlər tam başa çatdıqdan sonra ətrafda gülkarlıq və yaşıllıq zolağı da salınacaq.