"WhatsApp" istifadəçilərin fərdi məlumatlarını "Facebook"la bölüşəcək

"WhatsApp" messencerinin yaradıcıları fərdi məlumatların "Facebook"a ötürülməsinə dair istifadəçi razılaşmasına yeni bənd əlavə ediblər.

NUHÇIXAN İnformasiya Agentliyi xəbər verir ki, artıq bu barədə şirkət tərəfindən istifadəçilərə xəbərdarlıq edilib. İstifadəçi müqaviləsinin mətnində qeyd olunur ki, "Facebook"a aid olan "WhatsApp" istifadəçi vərdişlərini və zövqlərini təhlil etmək üçün onlar haqqında lazımi məlumatları şirkətin bütün "tətbiqetmə ailəsi" ilə bölüşəcək.

"WhatsApp" bu yeniliyi şirkətin fərdi reklamları istifadəçi istəklərinə uyğunlaşdırmaq, xidmətlərini inkişaf etdirmək, həmçinin müştərilərə ən uyğun olan məzmun və şəxsi xidmətlər göstərmək üçün olduğunu izah edir. Bildirilir ki, sosial şəbəkələrin qarşılıqlı inteqrasiyası istifadəçilər üçün imkanları genişləndirəcək.

Xatırladaq ki, "Facebook" korporasiyasına həmçinin "Instagram" və "Facebook Messenger"i də daxildir. Şirkət tərəfindən toplanan məlumatlar coğrafi məkanı, sosial şəbəkələrdə aktivliyi və smartfona bu proqramların quraşdırılıb-pozulmasını əhatə edəcək.