Gəncləşən Naxçıvanım
Tarixin yaddaşında
Pozulmaz bir izin var,
Nuh Peyğəmbər dövründən
Söhbətin var, sözün var.
Haqdan ocaq çatmısan-
Sönməyən od-közün var,
Hər gözə şax baxmağa
Cürətin var, üzün var,
Hər eldə, hər diyarda
Üzü ağ Naxçıvanım!
Gecəsi də gündüztək
Çilçıraq Naxçıvanım!
Min bir naxış vurulur
Yenə torpağa, daşa.
Bu gün, Nəqşi-cahanım,
Gözəlsən başdan-başa.
Bir arzun, bir niyyətin
Toxunmasın qoy daşa.
Qurub-yaradan əllər,
Yaşa, səni yüz yaşa!
Bəxtinə al Günəşdən
Pay düşən Naxçıvanım,
Mənim Gənclər Paytaxtım,
Gəncləşən Naxçıvanım!
Beş min ildir dünyaya
Düşüb səsin, sorağın,
Tarixinə aynadır
Gəmiqayan, Duzdağın.
İşığı haqdan gəlir
Sən yandıran çırağın,
Tarix kimi qədimdir
Dağın, daşın, torpağın.
Əshabi-Kəhfdən deyir
O müqəddəs “Quran”ım.
Müqəddəslər diyarı –
Müqəddəs Naxçıvanım!
Sən Tusi, Cəlil, Cavid,
Bəhruzlar diyarısan,
Sinəndə izi qalan
Nuhun yadigarısan.
Sən ulu Öndərimin
Fəxri, iftixarısan,
Dilimdən düşmür adın-
Dilimin şüarısan.
Hər oğluna, qızına
Candan əziz məkanım!
Mərd övladlar böyüdən
Ey, ana Naxçıvanım!
Min bir naxış vurulur
Yenə torpağa, daşa.
Bu gün, Nəqşi-cahanım,
Gözəlsən başdan-başa.
Bir arzun, bir niyyətin
Toxunmasın qoy daşa.
Qurub-yaradan əllər,
Yaşa, səni yüz yaşa!
Bəxtinə al Günəşdən
Pay düşən Naxçıvanım,
Mənim Gənclər Paytaxtım –
Gəncləşən Naxçıvanım!
Asim YADİGAR