Günün şeiri - Vətən...

Bu gün  Azərbaycan Xalq Cümhuriyyətinin  öz müstəqilliyini bəyan etdiyi tarixdir.

NUHÇIXAN İnformasiya Agentliyi şair, tərcüməçi, Azərbaycan Respublikasının əməkdar incəsənət xadimi Baba Vəziroğlunun “Vətən” şeirini  oxucularına təqdim edir:

Sabaha yol gedən bu gəmi bizim,

Onun hər sevinci, hər qəmi bizim.

Duyğusu, vurğusu Vətən adlanır -

Bir yerdə döyünən bu qəlbimizin...

Vətən bir Günəşdir, biz də zərrəsi,

Vətənsiz eyləmə, Tanrı, heç kəsi.

Torpağı, Vətəni sevənlər üçün

Bəlkə də fırlanır bu Yer kürəsi.

Vətən "yan" - deyəndə alışaq gərək,

Vətən "can" - deyəndə barışaq gərək.

Bir vətəndaş kimi biz özümüzdən -

"Vətənçün nə etdik?" - soruşaq gərək.

Vətən - elə anddır, keçilərmi heç,

Vətən - bir zirvədir, kiçilərmi heç,

Taleyin, qismətin yazısıdır bu,

Anadır, Vətəndir, seçilərmi heç?!.

Sənsən ən müqəddəs andımız, Vətən,

Canımız, qanımız, adımız - Vətən.

Sənin dar günündə dost-düşmənimiz,

Bilinir doğmamız, yadımız, Vətən...

Üçrəngli bayrağın Günəşlə qoşa,

Azad Azərbaycan, var ol, min yaşa!..