Reza Deqati Ermənistanın ekoloji terroruna məruz qalan Oxçuçaydan fotolarını paylaşıb - FOTOLAR

Dünya şöhrətli fotojurnalist Reza Deqati Ermənistanın ekoloji terroruna məruz qalan Oxçuçaydan fotolarını paylaşıb.

NUHÇIXAN İnformasiya Agentliyi xəbər verir ki, Reza Deqati paylaşımında yazıb: “Oxçuçay Ermənistandan başlayaraq, Azərbaycan ərazisindən keçir və Xəzər dənizinə tökülməzdən əvvəl İran və Azərbaycan arasındakı təbii sərhəd olan Araz çayına birləşir.

Ermənistan tərəfində iki böyük mədən zavodu mövcuddur: Qacaran-Zəngəzur mis-molibden və Qafan dəmir filizi emalı fabriki. İstehsal zamanı ağır metallarla çirklənmiş su Oxçuçaya tökülür.

Almaniyanın “Croniment” mədən şirkəti Ermənistanın Zəngəzur mis-molibden zavodunun 60 faiz səhmlərinə sahibdir. Onların internet səhifələrində “Metallar bizim ehtirasımızdır” deyilir.

Çaydakı nikelin miqdarı normadan 7 dəfə, dəmir 4 dəfə, mis-molibden isə 2 dəfə yüksəkdir.

Mart ayında çaydakı forel və digər balıqların kütləvi məhv olması müşahidə edildi.

Belə görünür ki, çay erməni istehsalçıları tərəfindən sənaye tullantılarının ölkə ərazisindən Azərbaycana göndərilməsi məqsədilə kollektor kimi istifadə olunur.

Ermənistan hələ də Beynəlxalq Su Konvensiyasına qoşulmayıb və beynəlxalq öhdəliklər götürməyib. Xəzər dənizinə tökülməzdən əvvəl həm Azərbaycanı, həm də İranı çirkləndirən səssiz bir ekoloji fəlakət müşahidə olunur”.