Naxçıvanda 3-cü doza “Pfizer” peyvəndinin tətbiqinə başlanılıb
NUHÇIXAN İnformasiya Agentliyi xəbər verir ki, Naxçıvan Muxtar Respublikasında “Sinovac” vaksininin 1-ci və 2-ci dozası ilə birgə 3-cü doza olaraq “Pfizer” vaksininin də tətbiqinə başlanıb. Mütəxəssislər Almanİya istehsalı olan və yüksək keyfiyyətilə seçilən “Pfizer” vaksininin viruslara qarşı daha təsirli və təhlükəsiz olduğunu bildirir.
Muxtar respublikamızda bu günədək 105 min 946 nəfər 1-ci doza, 93 min 787 2-ci doza, 1587 nəfər isə 3-cü doza, ümumilikdə isə 201 min 317 nəfər vaksinasiyaya cəlb olunub. Aparılan tibbi profilaktik tədbirlərin nəticəsində ölkəmizdə koronavirus infeksiyasına ən az yoluxma faktı da məhz elə Naxçıvanda müşahidə olunur.
Qeyd edək ki, “Azərbaycan Respublikasında COVID-19 xəstəliyi əleyhinə 2021-2022-ci illər üçün vaksinasiya strategiyası”na müvafiq olaraq muxtar respublikada pandemiyaya qarşı effektiv tədbirlər həyata keçirilir. Bu məqsədlə Naxçıvan Muxtar Respublikası Səhiyyə Nazirliyində xüsusi komissiya fəaliyyət göstərir. Komissiya muxtar respublikada COVID-19 virus infeksiyasına qarşı vaksinasiya işlərini təşkil edir.
Xosrov İbrahimov