Sədərəkdə yazılan gündəlik - VİDEO
Qanlı Yanvar faciəsi Azərbaycan xalqının azadlıq istəyinin qarşısını almaq cəhdi ilə yanaşı, həm də ermənilərin işğalçılıq siyasətinin həyata keçirilməsinə xidmət edən terror aktı idi. Ermənilərin faciədən bir neçə gün əvvəl Naxçıvana hücumları bunu bir daha təsdiq edir. 1990-cı il yanvarın 18-də Kərki kəndi SSRİ Müdafiə Nazirliyinin 7-ci ordusunun köməyi ilə ermənilər tərəfindən işğal olundu. Muxtar respublikanın ərazi bütövlüyü və vətəndaşlarının həyatı təhlükə altında qaldığından, beynəlxalq Qars müqaviləsinin şərtləri kobud sürətdə pozulduğundan Naxçıvan Muxtar Sovet Sosialist Respublikası Ali Soveti 1990-cı il yanvarın 19-da “Naxçıvan MSSR-də yaranmış ictimai-siyasi vəziyyət haqqında” tarixi Qərar qəbul etdi. Bu qərara əsasən Naxçıvan MSSR Sovet imperiyasının tərkibindən çıxdı. 1990-cı il yanvarın 20-də, Qanlı Yanvar hadisələrinin törədilməsindən 8 saat əvvəl Sədərəyə erməni silahlı dəstələrinin hücumları başladı və bununla da 20 Yanvar faciəsinin ilk qanlı səhifəsi yazıldı.
Naxçıvan televiziyasının şair-publisist Vaqif Məmmədovun iştirakı ilə hazırladığı “Sədərəkdə yazılan gündəlik” adlı filmdə bu barədə daha ətraflı danışılır. Qeyd edək ki, Sədərəkdə müəllim işləyən mərhum Vaqif Məmmədov bu döyüşlərin şahidi və iştirakçısı olub, bu barədə bir sıra dəyərli kitablar yazıb.
NUHÇIXAN İnformasiya Agentliyi “Sədərəkdə yazılan gündəlik” adlı filmi təqdim edir: