Şahbuz rayon Mədəniyyət Evində quruculuq işləri yekunlaşmaq üzrədir

Ötən dövrlərdə olduğu kimi, bu il də Şahbuz rayonunda quruculuq tədbirləri geniş vüsət alıb.

NUHÇIXAN xəbər verir ki, rayonun mərkəzi olan Şahbuz şəhəri yenidənqurma, abadlıq işləri sayəsində füsunkar bir görkəmə qovuşub. Hazırda bu işlərin davamı olaraq şəhərin mərkəzində yeni bir quruculuq ünvanının-Mədəniyyət Evinin inşası aparılır. Ötən əsrdən bəri uyğunlaşdırılmış, uçuq-sökük, köhnə binada fəaliyyət göstərən rayon Mədəniyyət Evinin inşaat işlərinə 2017-ci ilin sentyabr ayından başlanılıb. İki mərtəbədən ibarət olacaq binada rayon Mədəniyyət Şöbəsinin əməkdaşları üçün iş otaqları, bufet, dekorasiya və məşq otaqları, 280 yerlik tamaşa zalı yerləşəcək. Hazırda binanın daxilində boyama işləri aparılır. Binanın həyətyanı sahəsində isə səkilərin salınması, gül kollarının əkilməsi üçün gülkarlıqların yerləri hazırlanır.“Gəmiqaya” MMC-nin yüksək təcrübə sahibi olan inşaatçıları öhdələrinə götürdükləri işi, verilən tapşırıqları qısa müddətdə, keyfiyyətlə və var gücləri ilə vaxtında yerinə yetirmək üçün çalışırlar. Mədəniyyət Evinin bu il istifadəyə verilməsi nəzərdə tutulur.

        Novruz Məmmədov