Ötən ay 160 nəfərə əmək pensiyası təyin edilib
Naxçıvan Muxtar Respublikası Dövlət Sosial Müdafiə Fondundan NUHÇIXAN İnformasiya Agentliyinə bildirilib ki, “Əmək pensiyaları haqqında” Azərbaycan Respublikası Qanununa uyğun olaraq pensiya hüququ yaranan 160 vətəndaşın 120-si yaşa, 14-ü sağlamlıq imkanları məhdudluğa görə, 26-sı isə ailə başçısını itirməyə görə əmək pensiyasına çıxan vətəndaşlar olub. Pensiya təyin olunan vətəndaşların 108-i kişi, 52-si isə qadındır. Onlardan 147 nəfərinə qanunvericiliyə əsasən ilk dəfə təyinat olub, 13 nəfərinə isə pensiya növündə dəyişiklik edilib. Bundan başqa, fərdi uçot sistemində işlər davam etdirilib və yeni əmək fəaliyyətinə başlayan 326 sığortaolunana şəxsi hesab açılıb.
Fond ötən ay ərzində əmək pensiyalarının, sığorta prinsipi ilə pensiya alanlara 2022-ci ilin birinci rübü üzrə verilən maddi yardımın və məcburi dövlət sosial sığorta haqları hesabına müavinətlərin maliyyələşdirilməsini də vaxtından əvvəl başa çatdırıb, 18 milyon 188 min manat vəsait pensiya və müavinətlərin ödənilməsinə xərclənib.
Məcburi dövlət sosial sığorta haqqı üzrə 10 milyon 109 min 600 manat vəsait yığılaraq fondun xəzinə hesabına köçürülüb ki, bu da nəzərdə tutulan məbləğdən 9,6 faiz çoxdur. Pensiya və müavinətlərin ödənişinə ayrılan vəsaitin 55,6 faizi məcburi dövlət sosial sığorta haqqı olaraq muxtar respublikada yığılıb. Hesabat ayında 2 hüquqi və 214 fiziki şəxs məcburi dövlət sosial sığorta ödəyicisi kimi uçota alınıb.
Ötən ay, həmçinin deputatların, hərbi qulluqçuların, məhkəmə və hüquq-mühafizə orqanları əməkdaşlarının həyat və sağlamlığının dövlət icbari şəxsi sığortası sahəsində müvafiq işlər görülüb, sığortaedənlər tərəfindən 256 min 800 manat vəsait fondun xüsusi hesabına köçürülüb.
Qeyd edək ki, hesabat dövründə ölkə başçısının müvafiq sərəncamı ilə əmək pensiyalarının sığorta hissəsi cari ilin yanvar ayının 1-dən etibarən orta aylıq nominal əməkhaqqının illik artım tempinə uyğun olaraq 3,4 faiz indeksləşdirilərək artırılıb. Sərəncamın icrası nəticəsində muxtar respublika üzrə 40 min pensiyaçının pensiyasında artım qeydə alınıb. Bundan əlavə, sərəncama uyğun olaraq, əmək pensiyaçılarına birinci rüb üzrə 50 manat məbləğində maddi yardımın ödənilməsi təmin edilib.