Naxçıvanda “İslam filmləri həftəsi” keçiriləcək

Naxçıvanın İslam Mədəniyyəti Paytaxtı elan olunması ilə bağlı tədbirlər davam edir. Naxçıvan Muxtar Respublikası Mədəniyyət Nazirliyinin mətbuat xidmətindən NUHÇIXAN-a verilən məlumata görə, bu münasibətlə Naxçıvan şəhərində “İslam filmləri həftəsi” keçiriləcək. Açılış mərasimi sentyabrın 24-də olacaq həftənin filmləri sentyabrın 30-dək “Gənclik” Mərkəzində təqdim ediləcək. Tədbirin ilk günü tamaşaçılar Elçin Musaoğlunun rejissorluğu ilə çəkilən Azərbaycan filmi “Nabat”a baxacaqlar. Sentyabrın 25-də və 27-də  İran filmləri “Mən məktəbə getmək istəyirəm” (rejissor Hana Maxmalbaf), “Yağış”,  26-da Özbəkistan və Tacikistan kinematoqrafçılarının birgə istehsal etdiyi “Dahinin gəncliyi” (rejissor Elyar İşmühəmmədov), 28-də Türkiyə istehsalı olan “Ulak” filmi (rejissor Çağan İrmak) nümayiş ediləcək.  Sentyabrın 29-da kinosevərlər  Azərbaycanda istehsal edilən “Niyyət” (rejissor Samir Kərimoğlu) və “İslam filmləri həftəsi”nin son günü türk rejissoru Kürşat Kızbaşın “Eşqin rəqsi” sənədli filminə baxacaqlar.