Naxçıvanda meliorasiya işləri uğurla həyata keçirilib
Naxçıvan Muxtar Respublikası Dövlət Meliorasiya və Su Təsərrüfatı Komitəsinin mətbuat xidmətindən NUHÇIXAN-a verilən məlumata görə, bu ilin 9 ayı ərzində “Şəhər Su Təchizatı və Kanalizasiya İnvestisiya Proqramı” layihəsi çərçivəsində Babək rayonunun Şəkərabad kəndində müxtəlif diametrli borularla 17 kilometrə yaxın içməli su xətti çəkilib. 576 evə su verilərək sayğac quraşdırılıb. 16 km-ə yaxın kanalizasiya xətti çəkilib və bütün mənzillər şəbəkəyə qoşulub.
“Rayon mərkəzi və ətraf kəndlərin içməli su təchizatı və kanalizasiya sistemlərinin yenidənqurulması” layihəsi çərçivəsində Şahbuz şəhər çirkab su təmizləyici qurğuda tikinti işləri davam etdirilib.
Şərur rayonunun Yengicə kəndində müxtəlif diametrli borularla 30,29 km su xətti çəkilib, 894 ev şəbəkəyə qoşulub.
Ordubad rayonunda ümumi tutumu 20.000 m3olan 6 su anbarının tikintisi başa çatdırılıb, 18 subartezian quyusu qazılıb. Həmçinin Ordubad şəhərində müxtəlif diametrli borularla 73,5 km içməli su xətti, 72 km kanalizasiya xətti və anbarlar arası 7 km təzyiqli boru xətti çəkilib.
Sədərək rayonunda Dəhnə adlanan ərazidə 8 ha sahə, Kəngərli rayonunun Böyükdüz kəndi ərazisində 45 ha sahə hamarlanaraq əkin üçün yararlı vəziyyətə gətirilib.