Pauerliftinq üzrə muxtar respublika birinciliyinin qalibləri müəyyənləşib
NUHÇIXAN xəbər verir ki, sağlamlıq imkanları məhdud şəxslər arasında pauerliftinq üzrə muxtar respublika birinciliyi keçirilib. Naxçıvan Muxtar Respublikası Gənclər və İdman Nazirliyi ilə Paralimpiya Federasiyasının birgə təşkil etdiyi birincilikdə 20-ə yaxın idmançı iştirak edib. Naxçıvan şəhərindəki İlham Əliyev adına Olimpiya-İdman Kompleksində keçirilən birincilikdə idmançılar -75 və +75 kiloqram çəki dərəcələrində mübarizə aparıblar. Yekun nəticəyə əsasən, 75 kiloqram çəki dərəcəsindən az olan idmançıların mübarizəsində Nihal İmanov qalib adını qazanıb. Yasin Nağıyev ikinci, Arzuman Məmmədov üçüncü olub. +75 çəki dərəcəsində isə ilk üç pillədə Turan Hüseynov, Şahin Məmmədov və Araz Behbudov qərarlaşıblar.
Sonda qaliblərə diplom və hədiyyələr təqdim olunub.