Çin dünyanın ən iri pilotsuz nəqliyyat təyyarəsini uğurla sınaqdan keçirib

Çində istehsal olunan dünyanın ən iri pilotsuz nəqliyyat təyyarəsi ilk uçuş sınağını uğurla başa vurub.

NUHÇIXAN TASS informasiya agentliyinə istinadla xəbər verir ki, təyyarə oktyabrın 16-da Daxili Monqolustan Muxtar Rayonunun Baotou şəhərindəki sınaq poliqonundan havaya qalxıb.

“Feyxun-98” (“Uçan qu quşu-98”) Çinin kosmik elmlər və texnika korporasiyası (CASC) tərəfindən “Yun-5B” nəqliyyat təyyarəsinin prototipinin bazasında layihələndirilib. Təyyarədə yeni pilotsuz idarəetmə sistemi tətbiq olunub.

“Feyxun-98” təyyarəsinin maksimal uçuş çəkisi 2,5 ton, yük bölməsinin həcmi 15 kubmetr, yükqaldırma qabiliyyəti isə 1,5 tondur. Təyyarə 4,5 min metr maksimal yüksəklikdə saatda 180 kilometr sürətlə uçmaq üçün nəzərdə tutulub. Pilotsuz uçuş aparatı əlavə yanacaq götürmədən 1,2 min kilometr məsafəni qət edə bilir. Uçuş və enişinə 150 metrlik zolaq kifayət etdiyindən təyyarə mürəkkəb relyefli rayonlara yük nəqli üçün münasibdir.