Gənclərin VIII konfransı keçirilib - FOTOLAR

1019

NUHÇIXAN xəbər verir ki, Naxçıvan Muxtar Respublikası gənclərinin VIII konfransı keçirilib.

Konfrans iştirakçıları əvvəlcə ümummilli lider Heydər Əliyevin Naxçıvan şəhərinin baş meydanında  əzəmətlə ucalan  abidəsi önünə gələrək güllər düzüblər.

Sonra  onlar Heydər Əliyev Muzeyini ziyarət ediblər. Muzeydə ulu öndərin dövlətçilik və siyasi fəaliyyətini əks etdirən sənədlər, foto-şəkillər və digər materiallar barədə ətraflı məlumat verilib.

Konfrans iştirakçıları ulu öndərin abidəsi önündə xatirə şəkli  çəkdiriblər.

Cəlil Məmmədquluzadə adına Naxçıvan Dövlət Musiqili Dram Teatrında keçirilən konfransı  Naxçıvan Muxtar Respublikasının  gənclər və idman naziri  Azad Cabbarov açdıqdan sonra gündəlik təsdiq olunub.

Azad Cabbarov  qeyd edib ki,  ulu öndər Heydər Əliyevin müəyyənləşdirdiyi  dövlət gənclər siyasəti Azərbaycan Respublikasının Prezidenti cənab İlham Əliyev tərəfindən uğurla davam etdirilir. Dövlət gənclər  siyasəti Naxçıvan Muxtar Respublikasında da  yüksək səviyyədə həyata keçirilir. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında gənc istedadlara  dövlət qayğısının  artırılması haqqında” 2012-ci il 31 yanvar tarixli Fərmanı muxtar respublikamızda gənclərə göstərilən yüksək diqqət və qayğının ifadəsidir. Həmçinin, Ali Məclis Sədrinin Fərmanları ilə Naxçıvan Muxtar Respublikası gənc istedadlarının  “Qızıl kitabı”nın təsis edilməsi, Gənclər Fondunun yaradılması gənclərin  cəmiyyətin  aparıcı qüvvəsinə  çevrilməsi  istiqamətində atılan  mühüm addımlardır. Hazırda  muxtar respublika əhalisinin  140 min nəfərdən çoxunu, yaxud 30,8 faizini 14-29 yaşda gənclər təşkil edir. Bildirilib ki, Naxçıvan şəhərinin 2018-ci ildə ölkəmizin “Gənclər paytaxtı”, eyni zamanda  İslam Mədəniyyətinin Paytaxtı  seçilməsi ilə əlaqədar Naxçıvan şəhərində keçirilən bir sıra  ölkə və beynəlxalq səviyyəli tədbirlərdə də gənclərin vətənpərvərlik tərbiyəsinin təbliği, onların yaradıcılıq potensialının üzə çıxarılması və intellektual səviyyələrinin yüksəldilməsi diqqət mərkəzində saxlanılıb. Muxtar respublikada idmanın kütləviliyinə də diqqət artıb. Muxtar respublikanın idmançıları Azərbaycan, dünya, Avropa çempionatlarında  və beynəlxalq turnirlərdə fəal iştirak edib və uğurlar qazanıblar. Belə ki, bu ilin 9 ayı ərzində muxtar respublika idmançıları ölkə birinciliklərində 84, beynəlxalq turnirlərdə 83, dünya çempionatlarında  2, Avropa çempionatlarında 3 olmaqla, 172 medala sahib olublar.

Konfransda Azərbaycan Respublikasının gənclər və idman naziri Azad Rəhimov  Azərbaycan gənclərinin  VIII Forumuna hazırlıqdan, ən fəal gənclərin  bu toplantılarda  bir araya gəlib fikir mübadiləsi aparmalarından, ümumilikdə görülən işlərin mühüm töhfələrindən söz açıb. Bildirib ki, oktyabr  ayı ərzində gənclərin müxtəlif maraqları, problemləri, ölkənin inkişafında rolu, eləcə də Dayanıqlı  İnkişaf Məqsədləri və Strateji Yol Xəritələrinin icrasında iştirakı geniş müzakirə olunur və burada 2 milyon 700 min  Azərbaycan gəncinin çoxsaylı  nümayəndəsi iştirak edir. Naxçıvanlı gənclər ölkəmizin ictimai-siyasi həyatında xüsusi fəallıq göstərırlər.

Konfransda Naxçıvan Muxtar Respublikası Gənclər Fondunun icraçı direktoru Cəbi Quliyev, Naxçıvan Dövlət Universitetinin tələbəsi Fuad Babayev, Azərbaycan Respublikası təhsil nazirinin müavini Firudin Qurbanov, Azərbaycan Respublikası əmək və əhalinin  sosial müdafiəsi nazirinin müavini Mətin Kərimli, Birləşmiş Millətlər Təşkilatının   rezident  əlaqələndiricisi  Məzahir    Əfəndiyev   və Azərbaycan Respublikasının  Gənclər Fondunun  icraçı direktoru Fərid Cəfərov çıxış ediblər.

Konfransda Azərbaycan gənclərinin  VIII Forumuna  nümayəndələr seçilib və  qərar qəbul edilib.

Sonda Naxçıvan Dövlət Filarmoniyasının mahnı və rəqs ansamblının  konserti olub.

                                                                                                                  Əbülfəz Dünyamalıyev

Digər xəbərlər

Xəbərin mətnində orfoqrafik səhv var

Seçilən mətn düzəliş üçün göndəriləcək: