Naxçıvanda dekorativ tətbiqi sənət sərgisi açılıb - FOTOLAR
Naxçıvan şəhərinin 2018-ci il üçün İslam mədəniyyətinin paytaxtı seçilməsi ilə əlaqədar Naxçıvan Muxtar Respublikası Rəssamlar Birliyinin Bəhruz Kəngərli adına sərgi salonunda dekorativ tətbiqi sənət sərgisi açılıb. Sərgidə ağac üzərində oyma, vitrajlar, dəmir üzərində döymə, duz üzərində oyma, bədii xalçalar, müxtəlif maketlər, loqolar və digər nümunələrdən ibarət 100-ə yaxın dekorativ tətbiqi sənət əsəri nümayiş etdirilir. Bu dəfə Naxçıvanın peşəkar rəssamlarının əsərləri ilə yanaşı, tələbələrin də əl işləri sənətsevərlərə təqdim olunur.
Tədbirdə həmçinin Türkiyənin Naxçıvandakı baş konsulu Mehmet Emin Kiraz, İran İslam Respublikasının Naxçıvandakı baş konsulu Mənsur Ayrom və digər çıxış edənlər qeyd ediblər ki, bu gün Naxçıvanın rəssamları bütün dünyada özünə layiqli yer tutub. Onların əsərləri həm də qardaş Türkiyədə, həm də İranda bəyənilir və sevilir.
Sərgi zamanı Əməkdar rəssam Səyyad Bayramova 60 illik yubileyi münasibətilə xüsusi diplom təqdim olunub. Digər iştirakçılara isə Rəssamlar Birliyinin diplomları verilib.
Sonra dekorativ tətbiqi sənət sərgisinə baxış olub. Sərgi noyabr ayının 9-dək davam edəcək.
Turab Hacızadə