İƏT-in Baş katibi qlobal humanitar səyləri gücləndirməyə çağırıb

Rəqəmsal transformasiya məsələlərini müzakirə etmək və qlobal humanitar səyləri gücləndirmək üçün 56 ölkədən nümayəndələr Səudiyyə Ərəbistanının Ciddə şəhərində bir araya toplaşıb.

NUHÇIXAN “Saudi Press” agentliyinə istinadla xəbər verir ki, bazar günü Ciddədə Beynəlxalq Aypara İslam Komitəsi ilə İƏT-ə üzv ölkələrin Qırmızı Aypara və Qırmızı Xaç milli cəmiyyətləri arasında beşinci məşvərət toplantısı işə başlayıb. Məkkə valisi şahzadə Xalid Əl-Feysəlin himayəsi altında Səudiyyə Ərəbistanı Qırmızı Aypara Təşkilatının ev sahibliyi etdiyi tədbir iyulun 26-dək davam edəcək.

Səudiyyə Ərəbistanının Qırmızı Aypara Təşkilatının prezidenti Cəlal Əl-Ovaysi bildirib ki, bu tədbirin məqsədi Qırmızı Aypara və Qırmızı Xaç cəmiyyətləri arasında əməkdaşlığı artırmaq, təcrübə mübadiləsinə imkan yaratmaq, əməkdaşların bilik və bacarıqlarını inkişaf etdirməkdir. Onun sözlərinə görə, təşkilatlar öz təcrübələrini nəzərdən keçirmək imkanı əldə edəcəklər ki, bu da digər ölkələrdə tətbiq oluna biləcək vahid bir modelin tərtibinə şərait yarada bilər.

“Daimi təsir üçün mütəmadi əlaqə” mövzusuna həsr olunmuş toplantıda birgə humanitar fəaliyyətlərin sadələşdirilməsi, beynəlxalq hərəkatın təşviq edilməsi və humanitar səyləri əks etdirmək məqsədi ilə müxtəlif təşkilatların və qurumların koordinasiyalı təşəbbüslərinin həyata keçirilməsi məsələləri diqqət mərkəzində olub.

İƏT-in Baş katibi Hissein Brahim Taha İslam dünyasında humanitar fəaliyyət ekosistemini təkmilləşdirəcək planların işlənib hazırlanmasının vacibliyini vurğulayıb. O, insanların həyatını xilas etmək üçün təcili yardım səylərini tələb edən fəlakətlərin tez-tez baş verməsini nəzərə alaraq, bu sahədə qarşıya çıxan problemləri həll etmək üçün daha iddialı bir vizyonun zəruri olduğunu söyləyib. Taha həmçinin ehtiyac anında qardaşlarına yardım göstərməyin müsəlmanların vəzifəsi olduğunu bildirib. O, İƏT-in üzv dövlətlərdə Qırmızı Aypara və Qırmızı Xaç milli cəmiyyətləri ilə əməkdaşlığa hazır olduğunu bildirib.

İclasın ilk gününün gündəliyinə “humanitar işdə rəqəmsal transformasiya”nın müzakirəsi daxil edilib.

Toplantı çərçivəsində “İnsanlığa toxunuş” adlı sərgi də təşkil olunub.