Qar çiçəkləri
NUHÇIXAN Naxçıvan Dövlət radiosunun əməkdaşı Təranə Əliyevanın şeirlərini təqdim edir:
Asılıb ağacın boz budağından,
Yazdan bir pay alıb qar çiçəkləri.
Edir hər bir kəsə naz budağından,
Tökülür üstümə qar çiçəkləri.
Yarandı göydənmi, yoxsa ki yerdən,
Sübh vaxtı dolanan qırovdan, şehdən,
Mənim bilmədiyim sehrdən,sirdən,
Dolaşdı hər yanı qar çiçəkləri.
Səpildi könlümə zərifliyilə ,
Soyuq titrəyişi, xəfifliyilə,
Ağappaq , tərtəmiz sevgi səsilə,
Məftun etdi məni qar çiçəkləri.
Mən qara batmışam ağappaq , təmiz,
Qardan yaranıbdır soyuq, ağ dəniz,
Tökülür göylərdən ulduz - aybəniz.
Yağır, yenə yağır qar çiçəkləri.
Əvvəl qışa dönən qar yağışıdı,
Bütün təbiətə var baxışıdı,
Barsız ağaclara bar axışıdı
Bizim sevdiyimiz qar çiçəkləri.
TƏNHALIQ
Bezmişdim eyni yolu
hər gün getməkdən.
Eyni sözləri dönə-dönə eşitməkdən.
Usanmışdım eyni gözləri,
laqeyd üzləri
hər gün görməkdən.
Dəyişik bir şeylər
olsun istədim.
Hər şeydən, hər kəsdən
istədim ki,bir anlıq uzaqlaşım,
bir az dincəlsin başım.
Yolumu göylərdən saldım.
ağlı-qaralı bulud topalarından
yağış aldım.
Torpağa can verdim,
Dağlar,dərələr aşdım,
Quşlarla,yarpaqlarla pıçıldaşdım.
Axan suyu dinlədim,
uçan quşun arxasınca baxdım.
Günəş şəfəqi oldum,
çiçəklərin, otların qəlbinə axdım.
Dağ yoluna çıxdım,
Ayaqlarım dizəcən
qıpqırmızı laləliyə batdı.
Qayalıqda bir qartal gördüm,
zəhmli baxışıyla mənə baxdı.
Endim dəniz sahilinə,
dənə-dənə qumları əlimə tökdüm,
Yosun qoxulu dəniz havasını
ciyərlərimə çəkdim.
Qağayılar baş vurdu dalğalara.
Uzaqlarda bir gəmi göründü,
Gəldi, məni apardı kimsəsiz adalara.
Hər kəsdən, hər şeydən
istədim ki, bir anlıq uzaqlaşım,
bir az dincəlsin başım.