Ukrayna hökuməti PUA alınmasına 130 milyon dollar ayırıb

Ukrayna Nazirlər Kabineti pilotsuz uçuş aparatlarının (PUA) alınması üçün 5 milyard qrivna (təxminən 130 milyon dollar) ayırıb.

NUHÇIXAN xəbər verir ki, Ukraynanın Baş naziri Denis Şmıqal bu barədə özünün media hesabında yazıb.

“Bu gün təhlükəsizlik və müdafiə qüvvələrinə əlavə olaraq 5 milyard qrivna vəsait ayrılıb. Bu vəsait hərbçilərə lazım olan pilotsuz aparatların alınmasına sərf olunacaq”, - deyə Denis Şmıqal bildirib.

Baş nazirin sözlərinə görə, bu il hakimiyyət orqanları hərbi sənaye kompleksinin inkişafı üçün əlavə olaraq 1,36 milyard dollar, dron istehsalı üçün isə ümumilikdə 1 milyard dollardan çox vəsait ayırıb.

Qeyd edək ki, Ukraynanın 2024-cü il büdcəsində 43,5 milyard dollarlıq kəsir yaranıb. Müdafiə Nazirliyinin büdcə kəsiri isə 36 faiz və ya 11,3 milyard dollar təşkil edir. Kiyev kəsirin böyük hissəsinin Qərb müttəfiqlərinin köməyi ilə bağlanacağına ümidlidir.