Bu gün Milli Qəhrəman Eldar Tağızadənin doğum günüdür
Vətənə xidmət etməyi özünə şərəfli borc bilən oğullar bu yolda şəhid olsalar da, ölmürlər, daim qəlblərdə yaşayırlar. Əsrlər keçsə də, xalqımız onları xatirəsində cəsur qəhrəmanlar kimi yad edib, xatırlayır. Məhz onların əzmi, rəşadəti hesabına Ana Vətənimiz bu gün əminamalıq içində, xalqımız azad, müstəqil yaşayır. Belə qəhrəmanlarımızdan biri olan Eldar Tağızadə də xalqın təhlükəsizliyini təmin edib, xidməti vəzifəsini şərəflə yerinə yetirərkən ali məqama yüksəlib.
1963-cü il sentyabrın 6-da Bakı şəhərində ziyalı ailəsində dünyaya göz açan Eldar Abdulla oğlu Tağızadə uşaq yaşlarından səmimi, mehriban, ailəsinə bağlı, savadlı bir gənc kimi böyüyür. Nəsimi rayonu 164 saylı orta məktəbdə təhsil alan Eldar nizam-intizamlı və bilikli gənc olaraq müəllim və şagird kollektivi arasında çox sevilir. Məktəbi müvəffəqiyyətlə başa vuran qəhrəman həmin ili Bakı Dövlət Universitetinə qəbul olunaraq biologiya fakültəsini fərqlənmə diplomu ilə bitirir. O, Elmlər Akademiyasının Botanika İnstitutunda işlə təmin olunur. Ancaq polis orqanlarına marağı onu Səbail Rayon DİŞ-nin cinayət-axtarış şöbəsi ilə əməkdaşlıq etməyə cəlb edir. Onun cevik və bilikli gənc olması Daxili İşlər Orqanında xidmət edən rəhbərlərin diqqətindən yayınmır. Və tezliklə Eldar Tağızadə polis orqanında işə qəbul edilir. Qəhrəman bir il xidmət etdikdən sonra Sverdlovsk şəhərində cinayət axtarışı üzrə ali ixtisasartırma kursuna göndərilir. Kursunu bitirib geri qayıdan qəhrəman baş leytenant rütbəsi alaraq Səbail Rayon DİŞ-də əməliyyat müvəkkili vəzifəsinə təyin olunur. Qüsursuz xidməti ilə seçilib, verilən tapşırıqlarının öhtəsindən layiqincə gələn Eldar Tağızadə 1991-ci ildə kapitan rütbəsinə yüksələrək DİN-nin Terrorizmə və Banditizmə Qarşı Mübarizə İdarəsi rəisinin müavini vəzifəsinə verilir. Bir il sonra xidməti yeri dəyişdirilən qəhrəman Qarabağa ezam olunur. Burada o, “Şaka” ləqəbli təhlükəli qatili və onun dəstəsini zərərsizləşdirmək üçün əməliyyata rəhbərlik edir. Onun apardığı əməliyyat nəticəsində “Şaka”nın gizləndiyi ev müəyyən edilərək mühasirəyə alınır. Silahlı qarşıdurma olmadan təslim olunması təklifi verilən qatil bununla razılaşmır. Eldar Tağızadə yaranacaq təhlükənin qarşısını almaq üçün “Şaka”nın gizləndiyi binaya daxil olur. Silahlı atışma zamanı sinəsindən yaralanan kapitan qəhrəmancasına həlak olur. O, Bakı şəhər Şəhidlər Xiyabanında dəfn edilir.
Vətən qarşısında xidmətləri ilə seçilən şəhid Eldar Tağızadəinin ölkəmizin ərazi bütövlüyü və asayişin qorunmasında vəzifə borcunu şərəflə yerinə yetirdiyinə görə Azərbaycan Respublikası Prezidenti tərəfindən yüksək qiymətləndirilərək “Azərbaycanın Milli Qəhrəmanı” adına layiq görülür. Həmçin Xatirəsi əziz tutulan qəhrəmanın adı təhsil aldığı 164 saylı orta məktəbə və Bakı şəhərindəki küçələrdən birinə verilərək əbədiləşdirilib.
Səriyyə Salahova
Naxçıvan televiziyasının əməkdaşı