Dövlət Departamenti: Türkiyə Suriyada vəziyyətin nizamlanması üçün öz təsirindən istifadə etməlidir

ABŞ administrasiyası hesab edir ki, Ankara Suriyada vəziyyətin nizamlanması üçün öz təsirindən istifadə etməlidir.

NUHÇIXAN xəbər verir ki, bu barədə Dövlət Departamentinin mətbuat xidmətinin rəhbəri Metyu Miller jurnalistlər üçün müntəzəm brifinqdə bildirib.

“Dünən ABŞ dövlət katibi Antoni Blinken Türkiyənin xarici işlər naziri Hakan Fidan ilə telefon danışığı aparıb... Region ölkələrinin nümayəndələri ilə bütün söhbətlərimizdə hər bir ölkəni malik olduğu bütün təsir imkanlarından istifadə etməyə və eskalasiyaya son qoymağa çağırırıq. Biz heç bir ölkənin Suriyadakı qeyri-sabit vəziyyətdən istifadə etməyə çalışmasını istəmirik. Biz bütün ölkələrin öz təsirindən, təsir vasitələrindən deeskalasiya, mülki əhalinin müdafiəsi və nəticədə siyasi prosesin irəliləməsi üçün istifadə etməsini istəyirik”, – diplomat deyib.

Miller əlavə edib ki, ABŞ-nin Suriya Prezidenti Bəşər Əsədə münasibətdə siyasəti dəyişməyib. Eyni zamanda o, Vaşinqtonun əvvəllər dəfələrlə bəyan edildiyi kimi, onun vəzifəsini tərk etməsini istəyib-istəmədiyini dəqiqləşdirməkdən imtina edib.