Bayden Kaliforniya yanğınlarını ştat tarixində ən dağıdıcı yanğın adlandırıb
ABŞ prezidenti Co Bayden Kaliforniyada təxminən 11 min hektar əraziyə çatan yanğınları ştat tarixindəki ən böyük və ən dağıdıcı yanğın adlandırıb.
NUHÇIXAN xəbər verir ki, o, bu barədə cümə axşamı keçirdiyi mətbuat konfransında bildirib.
“Bunlar Kaliforniya tarixində ən geniş yayılmış və dağıdıcı yanğınlardır. Hazırda 360 min insan təxliyə edilib”, - deyə o bildirib.
ABŞ hakimiyyəti yanğını söndürmək üçün Kaliforniyaya əlavə yanğınsöndürmə qrupları və təyyarələr göndərir.
O həmçinin qeyd edib ki, Kanadadan da yanğınsöndürmə briqadaları və yanğınsöndürən təyyarələr gətirilib.
“AccuWeather” konsaltinq şirkətinin proqnozlarına görə, yanğınlar nəticəsində dəyən ziyan və iqtisadi itkilər 52-57 milyard dollar arasında olacaq.
"Financial Times" qəzeti JPMorganın məlumatlarına istinadən xəbər verir ki, sığorta şirkətlərinin Kaliforniyada baş verən yanğınlardan itkiləri 20 milyard dollar, ümumi zərər isə 50 milyard dollar təşkil edə bilər.