Tokayev: "Qazaxıstanın iqlim gündəliyi regional əməkdaşlıq prioritetlərinə əsaslanır"

Qazaxıstanın iqlim gündəliyi özündə regional əməkdaşlıq prioritetlərini, beynəlxalq qarşılıqlı fəaliyyəti və praqmatik ambisiyaları cəmləşdirir.

NUHÇIXAN-ın məlumatına görə, bunu Qazaxıstan Prezidenti Kasım-Jomart Tokayev "Mərkəzi Asiya – Avropa İttifaqı" sammiti çərçivəsində keçirilən Beynəlxalq İqlim Forumunun açılışında bildirib.

Onun sözlərinə görə, ölkə iqlim böhranı qarşısında həssas olan ölkələrə dəstək üzrə qlobal səylərə töhfə verir və "yaşıl keçidi” strateji prioritet kimi nəzərdən keçirir.

"Strategiyamızda bərpa olunan enerji əsas yer tutur. Biz "yaşıl hidrogen“in istehsalı üzrə dünyanın ən böyük layihələrindən birini həyata keçiririk. Dünyanın aparıcı korporasiyaları ilə tərəfdaşlıq çərçivəsində külək və günəş enerjisi istehsalı layihələrini işə salmışıq. Qazaxıstan dünya uranının təxminən 40 %-ni istehsal edir. Dünya elektrik enerjisinin təxminən 10 %-nin atom elektrik stansiyalarında istehsal olunduğunu nəzərə alsaq bu mühüm töhfədir. Qazaxıstan indi emissiyaları azaltmaq və enerji təhlükəsizliyini artırmaq üçün ilk atom elektrik stansiyasını inşa etməyi planlaşdırır", - K.Tokayev vurğulayıb.