İsveç polisi qadınlara qarşı zorakılıqla mübarizədə çatışmazlıqlarını etiraf edib

İsveç polis rəhbərliyi qadınların yaxın münasibətlər zamanı qətlə yetirilməsinin qarşısının alınmasında daxili yanaşmaların və empatiya çatışmazlığının ciddi maneəyə çevrildiyini etiraf edib.

NUHÇIXAN xəbər verir ki, bu barədə qadınlara qarşı ağır və ölümcül məişət zorakılığının qarşısını almağı hədəfləyən “Beta” adlı milli polis əməliyyatı çərçivəsində hazırlanmış hesabatda bildirilir.

Sənəddə 2023–2024-cü illərdə qadınların partnyorları və ya digər yaxın kişilər tərəfindən qətlə yetirildiyi 17 hadisə təhlil olunub. Bu hallardan üçündə polisin zorakılıq barədə məlumatı olmayıb. Qeyd olunur ki, bir sıra hallarda polis lazımi tədbir görsəydi, qadınlar sağ qala bilərdilər.

Mətbuat konfransında “Beta” əməliyyatının milli operativ rəhbəri Yale Polyarevius bildirib ki, problemin kökü bütövlükdə cəmiyyətin mədəniyyətindədir və polis yalnız qadının şikayətdən imtina etməsi ilə kifayətlənməməlidir. Onun sözlərinə görə, əməkdaşlarda empatiyanın inkişaf etdirilməsi işin əsas elementi olmalıdır.

Yeni fəaliyyət planı çərçivəsində polis standartlaşdırılmış prosedur siyahıları tətbiq etməyi, risk və həssaslıq amillərinə daha çox diqqət yetirməyi planlaşdırır. Bu, ilkin dindirmələrin keyfiyyətini artırmağa və zərərçəkənin işi davam etdirmək istəmədiyi hallarda belə istintaqın ardıcıl aparılmasına imkan verəcək.

Polis nümayəndələrinin sözlərinə görə, yeni strategiyanın məqsədi sistemli çatışmazlıqları müəyyənləşdirmək və onları operativ şəkildə aradan qaldırmaqdır.