BMT münaqişə zonalarında uşaqlara qarşı zorakılığın rekord səviyyəsini qeydə alıb

BMT 2024-cü ildə silahlı münaqişə zonalarında uşaqlara qarşı zorakılığın rekord səviyyəsini qeydə alıb.

NUHÇIXAN xəbər verir ki, bu barədə BMT Baş katibinin uşaqlar və silahlı münaqişələr haqqında məruzəsində deyilir.

2024-cü ildə silahlı münaqişə zonalarında uşaqlara qarşı 41 370 ciddi pozuntu qeydə alınıb – bu, təxminən 30 il əvvəl monitorinqin başlanmasından bəri ən yüksək göstəricidir. 2023-cü illə müqayisədə pozuntuların sayı 25 % artıb.

Ən çox hadisə İsraildə və Fələstin ərazilərində (xüsusilə Qəzza zolağında), həmçinin Konqo Demokratik Respublikasında, Somalidə, Nigeriyada və Haitidə qeydə alınıb.

2024-cü ildə ən geniş yayılmış pozuntu uşaqların öldürülməsi və şikəst edilməsi (11 967 hal) olub, ardınca humanitar yardımın rədd edilməsi (7 906 epizod) və uşaqların silahlı birləşmələrə cəlb edilməsi və ya istifadəsi (7 402 hal) gəlir.

Həmçinin məktəblərə hücumların (44 %) və cinsi zorakılığın (34 %) artması qeydə alınıb. Eyni zamanda bir neçə zorakılıq növündən əziyyət çəkən uşaqların sayı da artıb.

BMT həmçinin bildirib ki, münaqişə iştirakçıları ilə ehtimal olunan və ya faktiki əlaqəyə görə 3 018 uşağın saxlanılması halı qeydə alınıb. Məruzədə belə uşaqların ilk növbədə qurban kimi tanınması və həbsə alternativlərin axtarılması zərurəti vurğulanır.

Eyni zamanda, bəzi ölkələrdə müsbət dəyişikliklər müşahidə olunur: İraq, Pakistan və Filippində profilaktik tədbirlər həyata keçirilir ki, bunun sayəsində bu dövlətlər növbəti ildə BMT-nin uşaqlar və münaqişələr gündəliyindən çıxarılacaq.