Türkiyə Təhlükəsizlik Şurasının iclasında müzakirə ediləcək məsələlər məlum olub

Türkiyə Təhlükəsizlik Şurasının bu ilin əvvəlindən bəri keçiriləcək dördüncü iclasında meşə yanğınları, terrorizmlə mübarizə, PKK terror təşkilatının özünü buraxması və tərk-silah edilməsi, Suriya və Ukrayna məsələləri müzakirə ediləcək.

NUHÇIXAN xəbər verir ki, Prezident Rəcəb Tayyib Ərdoğanın sədrliyi ilə bu gün keçiriləcək iclasın iştirakçıları meşə yanğınları ilə mübarizəyə, o cümlədən yaşıl sahələrin yandırılması və təxribata qarşı tədbirlərə xüsusi diqqət yetirəcəklər.

Həmçinin PKK-nın Suriya qanadı, eləcə də bu qanlı strukturun Avropa ölkələrindəki hücrələrindən Türkiyənin milli təhlükəsizliyi üçün yaranan risklərin təhlili planlaşdırılır.

Bundan əlavə, Türkiyə Milli Təhlükəsizlik Şurasının üzvləri Rusiya Federasiyası ilə Ukrayna arasında uzunmüddətli sülhün təmin edilməsi üçün diplomatik səylərə diqqət yetirəcəklər. İstanbulda sülh danışıqlarının yeni raundu üçün şərait yaratmaq istiqamətində addımlar müzakirə olunacaq.