Qlobal elektromobil bazarında 10,7 milyonluq satış olub

Yanvar-iyul ayları arasında dünya üzrə satılan elektrikli avtomobillərin sayı 10 milyon 700 minə çatıb və bu dövr ərzində satışlar illik əsasda 27 faiz artıb.

NUHÇIXAN xəbər verir ki, Böyük Britaniyada yerləşən “Rho Motion” tədqiqat təşkilatı cari ilin ilk 7 ayı üçün elektromobil satış məlumatlarını açıqlayıb.

Məlumata görə iyul ayında qlobal miqyasda 1,6 milyon elektrik avtomobili satılıb. Bu rəqəm illik müqayisədə 21 faiz artsa da, satışlar aylıq müqayisədə 9 faiz azalıb. Üstəlik, iyul ayındakı satışlarda 21 faizlik artım yanvar ayından bu tərəfə ən aşağı göstərici hesab edilir. Bu satışların 6,5 milyonu qlobal bazarda liderlik mövqeyini qoruyan Çində baş tutub.

Yanvar-iyul ayları arasında Avropada elektrikli avtomobil satışları 30 faiz artaraq 2,3 milyon ədədə, Şimali Amerikada isə 2 faiz artaraq bir milyon ədədə çatıb.

Dünyanın qalan hissəsində elektromobil satışları yanvar-iyul ayları arasında 42 faiz artaraq 900 min ədədə çatıb. Açıqlamada qeyd olunub ki, Almaniya və Böyük Britaniya kimi bazarlar sürətlə irəliləyir, Fransada isə satışlar həvəsləndirici planlara baxmayaraq durğunlaşıb.