Çinin hazırladığı yeni tank piyadanın döyüş maşınını xatırladır
Çində həm orta sinif tank, həm də piyadanın döyüş maşını üçün əsas xüsusiyyətləri özündə əks etdirən modul platforma da daxil olmaqla yeni zirehli texnika ailəsi təqdimata hazırlaşır.
NUHÇIXAN xəbər verir ki, Çinin sosial media platforması olan “Weibo”da yayımlanan şəkillərdə hərbi paraddan əvvəl yük qatarlarına yüklənmiş texnikalar öz əksini tapıb.
Fotolarda ən diqqət çəkən hərbi texnikalardan biri yeni orta sinif tankdır. Tank gövdəsi və qülləsi boyunca gücləndirilmiş dinamik müdafiəyə malikdir və bu da müasir tank əleyhinə təhdidlərə qarşı sağqalma qabiliyyətinin yüksəldildiyini göstərir.
Paylaşımlardan aydın olur ki, Çin Qərb, Amerika və hətta Sovet dizayn ənənələrindən kəskin şəkildə fərqlənən yeni nəsil tankını təqdim etməyə hazırlaşır. “Defence Blog” nəşrinin yaydığı məlumatda qeyd olunur ki, Çində keçirilən son parad məşqlərindən çəkilmiş fotolarda əks olunan bəzi mənbələrin ZTZ-201 (və ya ZTZ-20) kimi tanıdığı texnikadır.
Görünən odur ki, Çin mühəndisləri ənənəvi zirehlə müasir elektronikanı və hibrid mobilliyi birləşdirən daha yüngül, sürətli və çoxməqsədli platforma yaratmağa fokuslanıblar. Konsept Qərbin ağır tank yanaşmasından fərqlənir. Çinlilər yeni dizaynda böyük kütləni azaldaraq yüksək sürət, rəqəmsal sistemlər və dronlar da daxil olmaqla idarəolunan silahlara qarşı daha yaxşı qorunma qabiliyyətini ön plana çıxarıblar.
Hərbi analitiklər çoxdan qeyd edirdilər ki, Çin logistika və istehsalı asanlaşdırmaq üçün modul və rəqəmsal zirehli platformalar axtarışındadır. Paylaşımlarda eyni modul şassi üzərində konfiqurasiya edilmiş başqa bir texnika da göstərilib. Həmin piyadanın döyüş maşını 30 mm-lik avtomatik topla təchiz edilib. Tank kimi, zirehli avtomobil də uzaqdan idarə olunan silah moduluna və aktiv müdafiə sisteminə malikdir. Bu dizayn onu göstərir ki, Çin müxtəlif texnikaları tək təməldən inkişaf etdirmək strategiyasını gücləndirir.
Ekspertlər zirehli texnikaların 3 sentyabrda, İkinci Dünya Müharibəsinin başa çatmasının 80-ci ildönümünə həsr olunmuş Pekin hərbi paradında rəsmi şəkildə təqdim olunacağını gözləyirlər. Bu kimi tədbirlər Çinin inkişaf etmiş silah sistemlərini nümayiş etdirdiyi və eyni zamanda hərbi doktrinasının dəyişməsinə dair işarələr verdiyi platforma kimi tanınır.
Nəriman Nəcəfov