Avropada istehlakçılar xərcləri azaldır və ABŞ istehsalı olan mallardan imtina edirlər

Avropa İttifaqı (Aİ) zonasında istehlakçılar ABŞ-ın tariflərini gözləyərək Amerika mallarından imtina edir və qeyri-zəruri xərcləri azaltmaqla xərcləmə vərdişlərini dəyişirlər.

NUHÇIXAN xəbər verir ki, bu, Avropa Mərkəzi Bankının (ECB) bazar ertəsi dərc etdiyi araşdırmada təsdiqlənib.

“Tariflərlə bağlı narahatlıqlara cavab olaraq, istehlakçılar xərcləmə vərdişlərini nəzərəçarpacaq dərəcədə dəyişirlər”, -deyə ECB-nin iqtisadi bülletenində qeyd edilir.

ECB sorğuda iştirak edənlərin təxminən 26%-nin Amerika mallarından qaçdığını qeyd edib. Onların təqribən 16%-i isə ümumi xərcləri azaltdığını bildirib.

Araşdırmada bildirilir: “Yüksək gəlirli ev təsərrüfatlarının Amerika mallarından imtina ehtimalı daha çoxdur. Azgəlirli ev təsərrüfatlarının isə ümumi xərcləri azaltmaq ehtimalı daha yüksəkdir”. ECB maliyyə savadlılığının da bu qərarlara təsir etdiyini bildirib.