Türkiyə sahilləri yaxınlığında silahları olan pilotsuz kater məhv edilib
Türkiyənin Trabzon vilayəti sahillərinin yaxınlığında idarəetməni itirmiş silahları olan pilotsuz kater aşkar edilərək məhv edilib.
Bu barədə NUHÇIXAN-a Türkiyənin Milli Müdafiə Nazirliyindən məlumat verilib.
Qeyd olunur ki, kater balıqçı gəmisi tərəfindən aşkar edilib. Qara dənizin təyin olunmuş sektoruna helikopterlər, PUA-lar, hərbi katerlər və tral gəmisi göndərilib.
“Rusiya-Ukrayna müharibəsi başlayandan bəri Qara dənizin Türkiyə sektorunda dəfələrlə minalar və idarəetməni itirmiş katerlər məhv edilib. Ən son belə hadisə sentyabrın 29-da ölkənin şimal-şərqindəki Trabzon vilayətinin sahilləri yaxınlığında baş verib. Pilotsuz kater Türkiyə Hərbi Dəniz Qüvvələrinin xüsusi təyinatlıları tərəfindən uzaqdan məhv edilib”, - deyə nazirliyin məlumatında deyilir.
Müdafiə Nazirliyi sahilboyu zonada olan balıqçıları və sahilyanı ərazinin ümumi əhalisini ayıq olmağa, şübhəli obyektlərlə təmasdan qaçmağa çağırıb.