Media: ABŞ Ukraynaya 20-50 ədəd “Tomahawk” raketi verə bilər

ABŞ Ukraynaya 20-50 ədəd “Tomahawk” qanadlı raketi tədarük edə bilər. Lakin bu sayda raket Ukraynada hərbi əməliyyatların dinamikasına ciddi təsir göstərməyəcək.

NUHÇIXAN xəbər verir ki, “Financial Times” qəzeti bu barədə ABŞ-ın Yeni Amerika Təhlükəsizliyi Mərkəzinin (Center for a New American Security) müdafiə proqramları direktoru Steysi Pettikona istinadla məlumat yayıb.

“Vaşinqton Ukraynaya cəmi 20–50 ədəd raket tədarük edə bilər, bu isə hərbi əməliyyatların gedişinə həlledici təsir göstərməyəcək”, - deyə ekspert bildirib.

Pentaqonun sabiq əməkdaşı Mark Kançian isə öz növbəsində ABŞ-da hazırda 4150 ədəd “Tomahawk” raketinin olduğunu və Vaşinqtonun Ukraynaya az sayda raket göndərə biləcəyini vurğulayıb. Onun sözlərinə görə, bu məhdudiyyətin əsas səbəbi Pentaqonun 2022-ci ildən bəri aldığı 200 raketin 120-dən çoxunun artıq istifadə olunması ilə bağlıdır. 2026-cı il büdcəsində isə cəmi 57 ədəd “Tomahawk” raketinin alınması nəzərdə tutulub. Eyni zamanda, Vaşinqton bu raketlərə başqa ölkələrə, o cümlədən Venesuelaya mümkün zərbələr üçün də ehtiyac duya bilər.

Xatırladaq ki, bir müddət öncə ABŞ Prezidenti Donald Tramp Ukraynaya “Tomahawk” raketlərinin mümkün tədarükü ilə bağlı açıqlama vermişdi.