Avropada su ehtiyatları sürətlə azalmaqdadır

Avropada su ehtiyatları sürətlə azalmaqdadır.

NUHÇIXAN “Spiegel” nəşrinə istinadla xəbər verir ki, Britaniyada aparılan araşdırmanın nəticələrinə əsasən, xüsusilə Cənubi və Mərkəzi Avropa ölkələrində, o cümlədən İspaniya, İtaliya, Fransa, Almaniya və Polşada son iyirmi ildə torpaq və yeraltı su ehtiyatları ciddi şəkildə azalıb.

Tədqiqatçılar iqlim dəyişikliyini bu prosesin əsas səbəbi kimi göstərirlər. Yeraltı suların azalması kənd təsərrüfatı, içməli su təminatı və ekosistemlər üçün ciddi təhlükə yaradır. Analiz nəticəsində Skandinaviyada və Şimali-Qərbi Avropada rütubətin artdığı, lakin Cənub və Cənub-Şərqi Avropada quraqlığın dərinləşdiyi müəyyən olunub.

Qeyd edək ki, Avropa Komissiyasının hazırladığı su müqavimətliliyi strategiyasında 2030-cu ilədək su istifadəsində ən azı 10 faiz səmərəlilik artımı nəzərdə tutulur. Tədqiqatda İspaniyanın azalan su ehtiyatlarının digər Avropa ölkələrinə, xüsusilə meyvə və tərəvəz idxal edən ölkələrə birbaşa təsir göstərə biləcəyi vurğulanıb.